Սյունիքի մարզպետի աշխատակազմ

Սյունիքի մարզում շարունակվում են մինչեւ 16 տարեկան երեխաների պարտադիր հաշվառման աշխատանքները։ Գործընթացը համատեղ իրականացվում է մարզի անձնագրային բաժինների, համայնքապետարանների, ՀՀ Սյունիքի մարզպետարանի աշխատակազմի կրթության եւ տեղական ինքնակառավարման եւ հանրապետական գործադիր մարմինների հարցերով վարչությունների, կրթօջախների կողմից։
Մարզպետարանի աշխատակազմի տեղական ինքնակառավարման եւ հանրապետական գործադիր մարմինների հարցերով վարչության պետ Սեյրան Ավետիսյանի տեղեկացմամբ, արդեն կատարվել է աշխատանքների 60 տոկոսից ավելին, ինչը հնարավություն է տալիս ասելու, որ նախատեսված ժամկետում` մինչեւ մայիսի 31-ը, աշխատանքները կավարտվեն։ Գործընթացում որեւէ խնդիրներ չկան, անձնագրային բաժիններում հերթեր չեն գոյանում, քանի որ նախօրոք մշակվել է գրաֆիկ եւ յուրաքանչյուր դպրոցի, մանկապարտեզի ծնող գիտի, թե երբ ներկայանա անձնագրային բաժին։
Սյունիքի մարզում մինչեւ 16 տարեկան երեխաների թիվը շուրջ 24 500 է, որից 14 604-ը հաճախում է դպրոց, 3 852-ը` նախադպրոցական ուսումնական հաստատություն։ Մնացած մանկահասակ երեխաները, որոնք եւս հաշվառման ենթակա են, մանկապարտեզ չեն հաճախում։ Վարչության պետը հավաստիացրեց, որ գործընթացում խոչընդոտներ չկան, միայն որոշ խնդիրներ կան այն երեխաների հաշվառման հետ կապված, որոնց երկու ծնողներն էլ բացակայում են հանրապետությունից։