Սյունիքի մարզպետի աշխատակազմ

Հորդառատ անձրևների պատճառով Կապան քաղաքի միջով հոսող Վաչագան գետը, որը Ողջի գետի աջ վտակն է, մայիսի 22-ի կեսգիշերին մոտ դուրս է եկել ափերից և ողողել Մելիք-Ստեփանյան փողոցի շենքերի բակերն ու նկուղային հարկերը: Հորդացած գետը քշել տարել է գետի վրա կառուցված հինգ մետաղական կամրջակները, մեկ էլեկտրասյուն, արմատախիլ արել ծառեր, ջրով լցրել ափամերձ կրպակները: Անհնարին էր դարձել փողոցով մեքենաների երթևեկը: Փողոցներն ու շենքերը հետագա ջրածածկումից պաշտպանելու համար դեպքի վայր են ժամանել Սյունիքի մարզային փրկարարական վարչության մեկ մարտական հաշվարկ:
Վարչության կողմից հայտարարվել է տագնապ և սկսվել է գետի ափամերձ պատնեշի ամրացման աշխատանքեր, որի համար տեխնիկայով աջակցել են քաղաքապետարանը և կոմունալ սպասարկման ձեռնարկության աշխատակիցները: Ողջ գիշեր դեպքի վայրում են եղել մարզպետարանի, քաղաքապետարանի,  ոստիկանության պատասխանատուները և ԱԻՆ Սյունիքի փրկարարական վարչության աշխատակիցները:
Փրկարարները հողազանգվածով լցված պարկերով ամրացրել են շենքերի մուտքերը, գետի հենապատերը: Աշխատանքները շարունակվել են մինչև առավոտյան ժամը 04.00-ը: Առավոտյան կողմ գետի հունը սկսել է իջնել: Ջուրն իր հետ բերելով մեծ քանակությամբ ցեխ, քարեր, ավազ, լցրել է քաղաքի կենտրոնական հատվածներ` մարզպետարանի հարակից Գ. Նժդեհ հրապարակ:
Մայիսի 23-ի վաղ առավոտյան կոմունալ ձեռնարկության աշխատակիցների ու փրկարարների կողմից սկսվել են քաղաքի փողոցների մաքրման աշխատանքները:
Դեպքի վայր են ժամանել մարզպետարանի և քաղաքապետարանի քաղաքաշինության ոլորտի պատասխանատուները:
Ստեղծված է հանձնաժողով` վնասի չափը ուսումնասիրելու համար: