Սյունիքի մարզպետի աշխատակազմ

   Սյունիքի առաջին ներդրումային համաժողովի երկրորդ օրը մարզպետ Վահե Հակոբյանը հանդիպել է մարզ ժամանած դեսպանների, բանկերի ներկայացուցիչների, փորձագետների հետ: Մարզպետը շնորհակալություն է հայտնել համագործակցության բարեհաջող մեկնարկի համար և հույս հայտնել, որ քննարկումները լուրջ խթան կհանդիսանան նոր ձեռնարկների համար:
ՙՙՙ ՙ Մենք արդեն մարզում ունենք օտարերկրյա ներդրումների հաջողված փորձ ու այդ օրինակներով մտադիր ենք վերհանել բացթողումներն ու առաջիկայում շտկել դրանք: Մեր գերխնդիրն է մոտ ապագայում անել առավելագույնը նոր աշխատատեղերի ստեղծման և գործազրկության մակարդակի հնարավորինս իջեցման ուղղությամբ, ունենալ մրցակցությանը դիմակայող փոքր ու միջին ձեռնարկություններով դինամիկ զարգացող Սյունիք: Վստահ եմ, որ Ձեր արժեքավոր խորհուրդներով աջակցելու եք ու հարստացնեք մեր ռազմավարական ծրագրերը՚ ՚:
Մարզպետն անդրադարձավ գյուղատնտեսության, սննդի վերամշակման ու արտադրության, զբոսաշրջության ոլորտներում ներդրումային հնարավորություններին , մանրամասն ներկայացրեց մարզի սոցիալ-տնտեսական զարգացման քառամյա ծրագիրը, շեշտեց, որ տրանսպորտային հիմնախնդրի լուծումը՝ մասնավորապես հյուսիս-հարավ առաջին կարգի ճանապարհի շինարարությունն ու Կապանի օդանավակայանի վերագործարկումը հնարավորություն կտա ավելի հավակնոտ ծրագրերով հանդես գալու:
ՙ ՙԳործարարները չեն կարողանում լիարժեք օգտվել մեր բանկային համակարգի գործիքակազմից: Արդեն հասունացել է մարզում տարածաշրջանային զարգացման հիմնադրամի ստեղծման գաղափարը, որը մասնակիորեն կֆինանսավորի փոքր ու միջին ձեռնարկատերերի բիզնես-առաջարկները: Դեռ լրամշակման բավականին աշխատանք կա այդ առումով, բայց կարծում եմ, ճիշտ ընտրելով ճանապարհը, կարող ենք զգալի արդյունքներ ակնկալել:
Հանդիպմանը ներկա քաղաքապետերը ներկայացրին իրենց համայնքների տնտեսական ու սոցիալական պատկերն ու զարգացման հեռանկարները: ԵԱՀԿ-ի դեսպան Եվգենի Սորոկինը շնորհակալություն հայտնեց ջերմ հյուրընկալության համար:
ՙ ՙՀիացած ենք Ձեր ուժեղ թիմով ու վստահ ենք, որ համաժողովի արդյունքներին երկար չենք սպասելու: Զեկույցներն ու շնորհանդեսներն օգտակար էին մեզանից յուրաքանչյուրի համար, փաստորեն համաժողովի նպատակներն իրականացան, ծանոթացանք Ձեր ներդրումային գրավչությանը, տնտեսական և մարդկային ներուժին: Անկասկած, այս հանդիպումները պարբերական են դառնալու և հիմքեր ենք գցելու նոր փոխշահավետ նախագծերի համար՚ ՚: