Սյունիքի մարզպետի աշխատակազմ

ՀՀ Սյունիքի մարզպետ Վահե Հակոբյանը դեկտեմբերի 1-ին հյուրընկալեց Ռուսաստանի Դաշնության Վոլգոգրադի մարզի պատվիրակությանը: Հյուրերը, ովքեր Սյունիք էին այցելել հայ-ռուսական միջտարածաշրջանային երրորդ համաժողովին մասնակցելու նպատակով, դեկտեմբերի 1-ի առավոտյան նահանգապետ Սերգեյ Բոժենովի գլխավորությամբ եղան Քաջարանում: ՀՀ Սյունիքի մարզպետ Վ. Հակոբյանի ուղեկցությամբ ռուսաստանցի հյուրերը շրջել են <<Զանգեզուրի պղնձամոլիբդենային կոմբինատ>> ՓԲԸ-ի բաց հանքում, արտադրամասերում, ծանոթացել ձեռնարկության արտադրության ծավալներին, հնարավորություններին: Ընկերության պատասխանատուները մանրամասն ներկայացրել են լեռնահանքային գերհսկայի զարգացման հեռանկարները: Վոլգոգրադի նահանգային իշխանությունների համար զգալի հետաքրքրություն է ներկայացրել <<ԶՊՄԿ>>-ի արտադրանքը:
Նախկինում՝ խորհրդային պետության տարիներին, Վոլգոգրադի <<Կարմիր հոկտեմբեր>> գործարանը համագործակցել է կոմբինատի հետ: Երկու մարզերի գործընկերության ու հետագա համագործակցության հետ կապված՝ նահանգապետ Սերգեյ Բոժենովը կարևոր համարեց նախկին կապերի վերականգնումն ու ամրապնդումը:
Պայմանավորվածություն ձեռք բերվեց առաջիկայում փոխայցելության վերաբերյալ: Սյունիքի մարզի պատվիրակությունը կմեկնի Վոլգոգրադ, որտեղ կստորագրվի համագործակցության հուշագիր: Մարզպետ Վահե Հակոբյանը նշել է, որ բոլոր հիմքերը կան փոխշահավետ համագործակցության և քույր մարզեր դառնալու համար: Մարզպետը միաժամանակ շեշտեց, որ մարզային իշխանության համար առաջնահերթը լինելու է փոքր ու միջին ձեռնարկատիրության ոլորտում ամուր ու փոխշահավետ գործընկերային կապերի ստեղծումը:
Հյուրերը այցելեցին նաև Տաթևի վանական համալիր, ծանոթացան հայկական մշակութային արժեքներին, ինչպեսև եղան <<Տաթևեր>> ճոպանուղում:
Դեկտեմբերի 2-ին ՀՀ Սյունիքի մարզպետ Վահե Հակոբյանի գլխավորությամբ Սյունիքի մարզի պատվիրակությունը մասնակցեց Գյումրիում և Երևանում կայացած հայ-ռուսական միջտարածաշրջանային երրորդ համաժողովին, որին մասնակցում էին նաև Ռուսաստանի Դաշնության շուրջ երկու տասնյակ տարածաշրջանների պատվիրակություններ: