Սյունիքի մարզպետի աշխատակազմ

Սյունիքի մարզպետ Վահե Հակոբյանը  դեկտեմբերի 17-ին  մարզպետարանի աշխատակազմի ստորաբաժանումների մի խումբ ղեկավարների ուղեկցությամբ աշխատանքային այցով Գորիսի տարածաշրջանում էր: Մարզպետն այցելեց Վերիշեն, Ակներ, Ներքին և Վերին Խնձորեսկ գյուղական համայնքներ: Հերթական այցի նպատակը տարածաշրջանի գյուղական համայնքներում առկա խնդիրներին, ինչպես նաև իրականացվող աշխատանքների ընթացքին ծանոթանալն էր:Մարզպետ Վ. Հակոբյանը գյուղապետարաններում անցկացրեց աշխատանքային խորհրդակցություններ՝ գյուղական համայնքների ղեկավարների, աշխատակազմերի և ավագանու անդամների մասնակցությամբ: Քննարկվեցին համայնքային ճանապարհների, ջրամատակարարման, համայնքային ենթակայության հաստատությունների խնդիրների վերաբերյալ, ինչպես նաև դպրոցների ջեռուցման, վերանորագման հետ առնչվող և մի շարք այլ հարցեր: Հանդիպումների ընթացքում մարզպետը լսեց բարձրացված խնդիրների վերաբերյալ բոլոր հարցերը: Առկա խնդիրների լուծմանն ընթացք տալու նպատակով հանձնարարականներ տրվեցին մարզպետարանի աշխատակազմի համապատասխան ստորաբաժանումների ղեկավարներին: