Սյունիքի մարզպետի աշխատակազմ

Փետրվարի 4-ից 7-ը Սյունիքի մարզի 4 տարածաշրջաններում կանցկացվի հանրապետական առարկայական օլիմպիադաների տարածքային փուլը, որին կմասնակցեն մարզի հանրակրթական ուսումնական հաստատությունների 2320 աշակերտ: Սահմանված կարգով ձևավորվել են առարկայական օլիմպիադաների հանձնաժողովի կազմերը, իսկ տեքստերի կազմման աշխատանքներին ներգրավվել են մարզի բոլոր տարածաշրջանների հանրակրթական ուսումնական հաստատությունների ուսուցիչներ:
Փետրվարի 4-ին մարզի օլիմպիականները կմրցեն <<Պատմություն>>, <<ՆԶՊ>> և <<Կենսաբանություն>> առարկաներից, որոնք կկայանան Կապանի թիվ 1, Գորիսի թիվ 3, Սիսիանի թիվ 4 հիմնական և Ագարակի միջնակարգ դպրոցներում:
Փետրվարի 5-ին Կապանի թիվ 3, Գորիսի թիվ 6, Սիսիանի թիվ 2 հիմնական և Ագարակի միջնակարգ դպրոցներում կկայանան օտար լեզուների՝ անգլերեն, գերմաներեն, ֆրանսերեն և <<Հայոց եկեղեցու պատմություն>> առարկաների օլիմպիադաները:
Փետրվարի 6-ին <<Հայոց լեզու>>, <<Աշխարհագրություն>> և <<Ինֆորմատիկա>> առարկաների օլիմպիադաները կանցկացվեն Կապանի թիվ 7, Գորիսի թիվ 1, Սիսիանի թիվ 1 հիմնական և Մեղրիի թիվ 1 միջնակարգ դպրոցներում:
Օլիմպիադայի վերջին օրը՝ փետրվարի 7-ին, Կապանի թիվ 6, Գորիսի թիվ 4, Սիսիանի թիվ 5 հիմնական և Մեղրիի թիվ 1 միջնակարգ դպրոցներում կկայանան <<Հայ գրականություն>>, <<Ռուսաց լեզու>> և <<Քիմիա>> առարկաների օլիմպիադաները:
Արդեն 2-րդ տարին է, ինչ <<Մաթեմատիկա>> առարկայի օլիմպիադան անց է կացվում համացանցի միջոցով: Այն կկայանա փետրվարի 8-ին ժամը 10-ին 5-ից 12-րդ /1863 աշակերտ/ դասարանցիների միջև:
Փետրվարի 15-ին ժամը 10-ին առաջին անգամ համացանցի միջոցով կանցկացվի նաև <<Ֆիզիկա>> առարկայի օլիմպիադան, որին կմասնակցեն մարզի 9-ից 12-րդ դասարանների 336 աշակերտներ: Մասնակից աշակերտների ցուցակը էլեկտրոնային փոստով ուղարկվել է հանրապետական կազմկոմիտե: