Սյունիքի մարզպետի աշխատակազմ

Այսօր տեղի ունեցավ ՀՀ Սյունիքի մարզխորհրդի այս տարվա առաջին նիստը, որը վարում էր ՀՀ Սյունիքի մարզպետ Վահե Հակոբյանը: Նիստին, մարզխորհրդի անդամներից բացի, մասնակցում էին նաև ՀՀ Սյունիքի մարզպետի տեղակալները, աշխատակազմի կառուցվածքային ստորաբաժանումների պատասխանատուները, հանրապետական գործադիր մարմինների տարածքային ծառայությունների և մարզային ենթակայության կազմակերպությունների ղեկավարները:
ՀՀ Սյունիքի մարզպետի 2013 թվականի գործունեության և մարզի սոցիալ-տնտեսական վիճակի մասին հաշվետվությունը մարզխորհրդի նիստի անդամներին և մասնակիցներին ըստ բնագավառների ներկայացրեց ՀՀ Սյունիքի մարզպետարանի աշխատակազմի ղեկավար Ռ. Ղազարյանը:
ՀՀ Սյունիքի մարզի 2010-2013թթ. սոցիալ-տնտեսական զարգացման ծրագրերի կատարման ընթացքի, 2013թ. տարեկան աշխատանքային պլանի կատարման և առաջիկա խնդիրների մասին զեկուցումով հանդես եկավ մարզպետարանի աշխատակազմի ֆինանսական և սոցիալ-տնտեսական զարգացման վարչության պետի պաշտոնակատար Թ.Ղազարյանը: Մարզի զարգացման ծրագրով նախատեսված 71.9 մլրդ դրամի ծրագրերի և ներդրումների մասին խոսելիս՝ նշվեց, որ ծրագիրը հաջողությամբ իրականացվել է:
Համաձայն տարեկան աշխատանքային պլանների մոնիտորինգի և գնահատման հաշվետվությունների՝ նախորդ չորս տարիներին փաստացի իրականացվել է 116.4 մլրդ դրամի ծրագրեր:Կառուցվել, հիմնանորոգվել, մասնակի վերանորոգվել և վերազինվել են մարզի 110 կրթական, 61 մշակութային և 33 առողջապահական կազմակերպություններ, իրականացվել են մեծածավալ քաղաքաշինական և ճանապարհաշինական ծրագրեր: Մեծ ներդրումներ են իրականացվել տուրիզմի զարգացման ոլորտում:
Ծրագրի 2013 թվականի ՏԱՊ-ով նախատեսվել էր իրականացնել 36.921 մլրդ դրամի ծրագրեր:Նախատեսված 177 միջոցառումներից, իրականացվել է 176 -ը, որից 128 ավարտվել է, 48 ընթացքի մեջ , 1-ը կիրականացվի 2014թ.-ին:
2013թ. ընթացքում մարզում սկսել են գործունեություն ծավալել 67 նոր կազմակերպություններ:Կարևորվեցին ներդրումային ծրագրերի իրականացումը՝ ըստ առաջնահերթությունների և արդյունավետության:
2014թ. նախատեսվում է մշակել նաև մարզի տնտեսաչափական մոդելը, որը հնարավորություն կտա չափելի դարձնել կատարվող ներդրումների ազդեցությունը մարզում եկամուտների ավելացման, վճարվող հարկերի, տնտեսության տվյալ ճյուղի, տնտեսության տվյալ ճյուղի հետ կապված մյուս ճյուղերի, աղքատության, գործազրկության և այլ ցուցանիշների վրա, կապված տվյալների բազայի չափից:
ՀՀ Սյունիքի մարզպետարանի աշխատակազմի իրավաբանական բաժնի պետ Կ.Կոզմանովը տեղեկություններ ներկայացրեց համայնքներին առնչվող ՀՀ օրենսդրության մեջ կատարված փոփոխությունների և ՏԻՄ-երի կողմից դրամական պահանջների վերաբերյալ կայացված որոշումների հարկադիր կարգով կատարման հնարավորությունների,խնդրի հետ կապված համայնքների ղեկավարների ու ավագանիների գործառույթների և անելիքների մասին:
Սյունիքի մարզի Վարդանիձոր համայնքում 2013թ. տեղական ինքնակառավարման մարմինների գործունեության մասին ՀՀ Սյունիքի մարզի Վարդանիձոր համայնքի ղեկավար Ա.Բեկլարյանը իր զեկույցում նշեց, որ 2008-2012 թվականներին մեր համայնքում զգալի ներդրումներ են կատարվել սոցիալ-տնտեսական խնդիրների լուծման ուղղությամբ՝ շուրջ 67 մլն դրամի, որի արդյունքում լուծվել են համայնքի բնակավայրերի առաջնահերթ լուծում պահանջող հիմնախնդիրները: Մասնավորապես, բարեկարգվել են ներհամայնքային ավտոճանապարհներ, խմելու և ոռոգման ջուր, առանձին հատվածներում նաև կոյուղի:
Օրակարգային հարցերի շրջանակներում քննարկումներին ելույթներով հանդես եկան Քաջարան քաղաքային և Քարահունջ գյուղական համայնքի ղեկավարները,ովքեր ներկայացրեցին 2013թ. կատարված աշխատանքները և 2014թ. ծրագրերն ու անելիքները:
Ամփոփելով մարզխորհրդի նիստը՝ մարզպետ Վ. Հակոբյանը դիմելով համայնքների ղեկավարներին՝ հորդորեց բարձրացված հարցերը քննարկել շահագրգիռ մարմինների և կազմակերպությունների հետ, միաժամանակ կարևորելով իրավական ակտերի կազմման որակի ապահովման և արձանագրված թերությունների վերացման նպատակով մարզպետարանի համապատասխան ստորաբաժանումների հետ ամենօրյա փոխգործակցության անհրաժեշտությունը: