Սյունիքի մարզպետի աշխատակազմ

 ՀՀ փոխվարչապետ, տարածքային կառավարման նախարար Արմեն Գևորգյանի մոտ մարզպետների մասնակցությամբ այսօր կայացած խորհրդակցության ընթացքում քննարկվեցին մարզերում առաջնահերթ խնդիրների լուծման նպատակով իրականացվելիք հինգերորդ հրատապ ծրագրի հետ կապված հարցեր: Մարզպետները տեղեկացրեցին, որ անհրաժեշտ քննարկումներ են եղել տեղերում, և արդեն վերջնականացվել են յուրաքանչյուր մարզից ծրագրի համար ներկայացվող հայտերը:
Խորհրդակցությանը ներկայացվեցին նաև հանրապետության համայնքների սեփական եկամուտների 2014թ. առաջին երկու ամիսների կատարողականի ցուցանիշները: Նշվեց, որ համայնքների սեփական եկամուտների կատարողականը կազմել է 110 տոկոս` նախորդ տարվա նույն ժամանակահատվածի համեմատ արձանագրվել է 21,2 տոկոս աճ: Փոխվարչապետը մարզպետներին առաջարկեց խնդիրը մշտական ուշադրության կենտրոնում պահել, և ընթացքում թերացումներ նկատելու դեպքում պատճառները քննարկել տեղերում:
Քննարկվեցին նաև մարզպետարանների և համայնքապետարանների ենթակայությամբ գործող առողջապահական հաստատությունների ֆինանսավորմանն ու գործունեության արդյունավետ կազմակերպման հարցեր: Մարզպետները նաև տեղեկություններ ներկայացրեցին հողօգտագործողներին մատչելի գնով պարարտանյութի, դիզվառելիքի, ինչպես նաև սերմացուի հատկացման ծրագրերի ընթացքի մասին: Քննարկվեցին համայնքների գլխավոր հատակագծերի կազմման, ինչպես նաև կադաստրային գործընթացներին վերաբերող հարցեր:
Անդրադարձ եղավ նաև մարտի 9-ին հանրապետության շուրջ հինգ տասնյակ համայնքներում տեղական ինքնակառավարման մարմինների ընտրությունների անցկացման հետ կապված հարցերին: Մարզպետները տեղեկացրեցին, որ անհրաժեշտ նախապատրաստական և տեխնիկական աշխատանքերն իրականացված են:
Փոխվարչապետը նաև մարզպետների ուշադրությունը հրավիրեց միջպետական և հանրապետական նշանակության ճանապարհների հարակից տարածքներում աղբահանության կազմակերպման խնդրին` ընդգծելով համապատասխան համայնքների ղեկավարների կողմից աշխատանքների պատշաճ իրականացման անհրաժեշտությունը: Քննարկվեցին նաև ընթացիկ մի շարք այլ հարցեր:

  Աղբյուրը` mta.gov.am