Սյունիքի մարզպետի աշխատակազմ

Երկօրյա ճանաչողական այցով Սյունիքում գտնվող Հայաստանում Չեխիայի Հանրապետության դեսպանատան գործերի ժամանակավոր հավատարմատար Պետր Միկիսկան` մարզպետարանում կայացած հանդիպումից հետո, ՀՀ Սյունիքի մարզպետ Վահե Հակոբյանի ուղեկցությամբ այցելեց <<Զանգեզուրի պղնձամոլիբդենային կոմբինատ>> ՓԲԸ և ծանոթացավ արդյունաբերական հսկայի գործունեությանը և վերազինման աշխատանքներին: Հյուրերը հետաքրքրվեցին հանքաքարի կորզումից մինչև մշակում ու իրացում կատարվող բոլոր քայլերին: Չեխ դիվանագետն իր գոհունակությունը հայտնեց ձեռնարկության արտադրական, նորագույն տեխնոլոգիաների ներդրման, ինչպես նաև սոցիալական քաղաքականության առնչությամբ: Պետր Միկիսկան շրջեց նաև կաթի և մսի վերամշակմամբ զբաղվող «Մարիլա» ընկերությունում: Ընկերության պատասխանատուները նշեցին, որ ժամանակակից սարքավորումներով, անարատ տեղական հումքով պատրաստաված սննդամթերքը պահանջարկ ունի Հայաստանում և հարկ եղած դեպքում կարող է արտահանվել: Վահե Հակոբյանը նշեց, որ մոտ ապագայում փորձ կարվի բարեկամ երկրների գործարարների փոխայցեր կազմակերպել համգործակցության ոլորտները հստակեցնելու համար: Մարզպետը հյուրերին տեղեկացրել է, որ ժամանակին մարզը չեխական երկու խոշոր գարեջրի գործարաններ է ունեցել և ցանկություն կա աշխատանքներ տանել դրանց վերագործարկման ուղղությամբ, որի համար հայկական կողմը պատրաստակամ է ջրերի շշալցման սարքավորումների ձեռք բերել: Մարզպետը կարևորեց համագործակցությունը,, որի հաջողությունը թույլ կտա նվազեցնել գործազրկության մակարդակը, ինչպես նաև չեխական բիզնեսի փորձը ներդնել մեր տարածաշրջանում: Օրակարգում է նաև Խնձորեսկում փոքրիկ գարեջրատուն հիմնելու ծրագիրը, որը կարող է նպաստել տուրիզմի զարգացմանը: Երկու պաշտոնյաները երկուստեք հանդիպումներըը գնահատեցին արդյունավետ և հույս հայտեցին, որ այսուհետ հայ-չեխական համագործակցությունը Սյունիքի մարզում կընդլայնվի ու կզարգանա: