Տեղեկատվական կենտրոն
Նորություններ
ԺԱՅՌԱԲԵԿՈՐԱՅԻՆ ՍՈՂԱՆՔ ԾԱՎ-ՇԻՇԿԵՐՏ ՃԱՆԱՊԱՐՀԻՆ
09.12.2014
Դեկտեմբերի 6-ին Մ-17 միջպետական նշանակության Ծավ-Շիշկերտ ճանապարհը անանցանելի էր դարձել ճանապարհի 3-րդ կիլոմետրի հատվածում տեղի ունեցած ժայռաբեկորային մեծ սողանքի հետևանքով: Հսկայական ժայռաբեկորների առկայության պայմաններում տեղի առկա միջոցներով հնարավոր չի եղել քարամաքրման և հողահեռացման աշխատանքների իրականացումը:
Ծավ գյուղական համայնքի ղեկավար Սեյրան Զաքարյանը կատարվածի մասին հայտնել է Սյունիքի մարզպետարանի աշխատակազմի քաղաքաշինության վարչությանը: Վարչության պետի պաշտոնակատար Ռ. Ավետիսյանը, մարզպետարանի աշխատակազմի քաղաքաշինության վարչության համապատասխան աշխատակիցների և Կապանի <<ՃՇՇ>> ՍՊԸ ճարտարագետ-ինժեների հետ, մեկնել է դեպքի վայր և տեղում ծանոթանալով իրավիճակին` զեկուցել է ՀՀ Սյունիքի մարզպետ Սուրիկ Խաչատրյանին: Կատարավածի մասին իրազեկվել է նաև տրանսպորտի և կապի նախարարությունը:
Դեկտեմբերի 9-ից դեպքի վայրում պայթեցման աշխատանքներ են իրականացնում Սյունիքի մարզային փրկարարական վարչության օպերատիվ խումբը և Երևանից ժամանած հատուկ նշանակության փրկարարական աշխատանքների իրականացման կենտրոնի աշխատակիցները: Աշխատանքների բարդության և զանգվածայնության պատճառով Ծավ-Շիշկերտ ճանապարհը դեռ երթևեկելի չէ: