Սյունիքի մարզպետի աշխատակազմ

Ծավ-Շիշկերտ ճանապարհն արդեն մաքրվել է ժայռաբեկորներից և ամբողջությամբ երթևկելի է տրանսպորտային բոլոր միջոցների համար:
ՀՀ Սյունիքի մարզի Ծավ և Շիշկերտ գյուղերն իրար կապող միջպետական Մ 17 ճանապարհից դեպի Շիշկերտ տանող ավտոճանապարհի 3-րդ կիլոմետրանոց ճանապարհը դեկտեմբերի 6-ից անանցանելի էր դարձել ժայռաբեկորային սողանքի պատճառով: Ժայռաբեկորները երկկողմանի փակել էին հանրապետական նշանակության ավտոճանապարհը և անանցանելի էին դարձրել միջպետական ճանապարհի նշված հատվածը:
Միջպետական նշանակության ճանապարհին ընկած հսկայական ժայռաբեկորները հնարավոր չի եղել մաքրել տեղի ուժերով:
Դեկտեմբերի 9-ից դեպքի վայրում պայթեցման աշխատանքներ են իրականացնում Սյունիքի մարզային փրկարարական վարչության օպերատիվ խումբը և Երևանից ժամանած հատուկ նշանակության փրկարարական աշխատանքների իրականացման կենտրոնի աշխատակիցները:
ՀՀ տրանսպորտի և կապի նախարար Գագիկ Բեգլարյանի հանձնարարությամբ փլուզված ճանապարհահատված էին այցելել նախարարության համապատասխան ստորաբաժանումների մասնագետները՝ տեղում իրավիճակին ծանոթանալու, արագ և օպերատիվ լուծումներ գտնելու նպատակով:
Արդեն քանի օր է ճանապարհի վթարված հատվածում աշխատանքներ են կատարում Կապանի ճանապարհաշինական ընկերության աշխատակիցները: Նման ծավալի փլուզում այս ճանապարհին առաջին անգամ է: