Սյունիքի մարզպետի աշխատակազմ

 ՀՀ Սյունիքի մարզպետ Սուրիկ Խաչատրյանը Ուսուցչի օրվա առթիվ կրթության ու մանկավարժության բնագավառում ներդրած ավանդի, մատաղ սերնդի դաստիարակության գործում ունեցած վաստակի և մանկավարժական երկարամյա աշխատանքի համար մի խումբ մանկավարժների պարգևատրել է շնորհակալագրերով ու <<Ակսել Բակունցի>> հուշամեդալով:
Այսօր Սյունիքի մարզպետարանի նիստերի դահլիճում մարզպետ Ս. Խաչատրյանը հանձնել է պարգևները:
Շնորհավորելով մասնագիտական տոնի առթիվ` մարզպետը երախտիքի խոսքեր է ասել ուսուցիչներին՝ իրենց կոչմանը հավատարիմ մնալու և իրենց գործը արժանապատվորեն կատարելու համար: Մարզպետը մասնավորապես նշել է, որ ուսուցիչը ամնենամեծ կոչումն է, իսկ սյունեցի ուսուցիչը միշտ եղել է բարձունքին:
Մարզպետը, կարևորելով ուսուցչի աշխատանքը, առաջադրված նպատակները, մասնավորապես ընդգծել է նրանց դերն ու վաստակը մեր երկրի վաղվա քաղաքացու ձևավորման, հայապահպանության, ինչպես նաև ժամանակի մարտահրավերներին դիմակայելու գործում:
Միջոցառման ընթացքում բարեմաղթանքի խոսքով հանդես եկավ նաև մարզպետարանի աշխատակազմի կրթության, մշակույթի և սպորտի վարչության պետ Հ. Ալեքսանյանը, ով իր խոսքում մասնավորապես ընդգծեց ուսուցչի լուսավոր կերպարի կարևորությունը: