Սյունիքի մարզպետի աշխատակազմ

Այսօր մարզպետարանի նիստերի դահլիճում տեղի ունեցավ ՀՀ Սյունիքի մարզխորհրդի հերթական նիստը, որը վարում էր ՀՀ Սյունիքի մարզպետ Սուրիկ Խաչատրյանը:Նիստին մասնակցում էին ՀՀ Սյունիքի մարզպետարանի աշխատակազմի կառուցվածքային ստորաբաժանումների, մարզի քաղաքային ու գյուղական համայնքների, հանրապետական գործադիր մարմինների տարածքային ծառայությունների և մարզային ենթակայության կազմակերպությունների ղեկավարներ:
Մարզում գյուղատնտեսական աշխատանքների կատարման և աշնանացանի հետ կապված անելիքների մասին զեկույցով հանդես եկավ ՀՀ Սյունիքի մարզպետարանի աշխատակազմի գյուղատնտեսության բաժնի պետ Ն. Շադունցը:Նշվեց, որ մարզում այս տարի բերքի տակ է դրվել 34843 հա ցանքատարածություն, որից 26113 հա` հացահատիկային, 410` հատիկաընդեղենային, 1083.5՝ բանջարային, 6230՝ կերային, 16՝ տեխնիկական մշակաբույսեր, 1747.4 հա կարտոֆիլ: Պտղի և հատապտղի ցանքատարածությունները կազմել են 2591 հա, խաղողը` 185: Նշված բոլոր ցուցանիշներում նախորդ տարվա համեմատ գրանցվել է աճ, ցանքային մշակաբույսերը նախորդ տարվա համեմատ ավելացել են` 1470հա-ով:
Մարզին հատկացվել է 1500000լ դիզվառելիք, 2200 տ ազոտական պարարտանյութ, 250 տ գարնանացան գարու, 2 տ առվույտի, 40 տ կորնգանի սերմացու, 800 տ աշնանացան ցորենի առաջին վերարտադրության սերմացու: Ավելացել է անասնագլխաքանակը: Ավարտվել են աշնանացան և գարնանացան հացահատիկային մշակաբույսերի բերքահավաքի աշխատանքները` 15342 հա աշնանացան ցորենից ստացվել է 46794 տ համախառն բերք, 4719 հա գարնանացան գարուց՝ 3303 տ, 92 հա գարնան ցորենից՝ 65 տ համախառն բերք: Գարնանացան հացահատիկային մշակաբույսերի ցածր բերքատվությունը պայմանավորված է երկարատև երաշտով: Այսօրվա դրությամբ կատարվել է 9550հա աշնանացան հացահատիկային մշակաբույսերի ցանքս, որից 400հա` աշնանացան գարու:
Անգեղակոթ, Ախլաթյան, Բռնակոթ, Շաքի և Սպանդարյան համայնքներում կատարվել է 10.350 հա արոտների ջրարբիացում: Ընթացքի մեջ են Կոռնիձոր, Շինուհայր, Նորավան, Աղիտու, Իշխանասար, Որոտան համայնքների ծրագրերի կառավարման և պլանների մշակման գործընթացը:
Օրակարգային հաջորդ հարցը վերաբերում էր մարզի համայնքներում 2015թ. 9 ամիսների համայնքային բյուջեների սեփական եկամուտների հավաքագրման ընթացքին և առկա խնդիրներին: Ֆինանսական և սոցիալ-տնտեսական զարգացման վարչության պետ Հ. Հովհաննիսյանն իր խոսքում նշեց, որ սեփական եկամուտների՝ 9 ամսվա համար նախատեսված 935942.6 հազ.դրամի դիմաց հոկտեմբերի 1-ի դրությամբ հավաքագրվել է 994686.7 հազ.դրամ կամ նախատեսվածի 106.3%-ը: 2014թ.-ի նույն ժամանակահատվածի համեմատությամբ հավաքագրման աճը կազմել է 10.6 % : Մարզի 19 համայնքներում սեփական եկամուտների հավաքագրումը չի գերազանցում տարեկան պլանների 50% ցուցանիշը: Շեշտվեց, որ համայնքի բյուջեի բոլոր եկամտատեսակները ենթակա են հավաքագրման և մեկ եկամտատեսակի կատարումը չպետք է բացասաբար անդրադառնա մյուսի կատարման վրա:
Քաղաքաշինության վարչության պետ Ռ. Ավետիսյանը ներկայացրեց քաղաքաշինության ոլորտում իրականացված տեսչական ստուգումների արդյունքներն ու ծրագրերը: Վարչական հսկողություն է անցկացվել ժամանակացույցով նախատեսված 27 համայնքներում:Մարզի համայնքներից 27 հողհատկացման առաջարկությունից մերժվել է 7-ը, ՀՀ քաղաքաշինության նախարարություն ներկայացված 11 հողհատկացման առաջարկությունից՝ 1-ը: Մարզպետարան է ներկայացվել 147 շինարարության, 3 քանդման թուլյտվություն և 66 շինարարության շահագործման փաստագրման ակտ:
Մարզում քաղաքացիական պաշտպանության ոլորտում իրականացված աշխատանքների և առաջիկա անելիքների մասին հաշվետվությամբ հանդես եկավ ՀՀ ՏԿԱԻ նախարարության Փրկարար ծառայության Սյունիքի մարզային փրկարարական վարչության պետ Բ. Զաքարյանը: Նշվեց, որ ընթացիկ 9 ամիսների ընթացքում մարզի տարածքում գրանցվել է 637 արտակարգ դեպք, որից 539-ը տեխնածին, այդ թվում՝ հրդեհի 324, ՃՏՊ-ի՝ 53, մերկասառույցի՝ 23, քամու ուժգնացման՝ 6, երկրաշարժի՝ 2, քարաթափման՝ 17, սոցիալ-կենցաղային բնույթի՝ 136 դեպք:
Ելույթներով հանդես եկան Վերիշեն, Խոտ և Վարդանիձոր համայնքների ղեկավարները:
Ամփոփելով մարզխորհրդի նիստը` մարզպետ Սուրիկ Խաչատրյանը խոսեց մարզի տարբեր ոլորտներում արձանագրված ձեռքբերումների մասին, նշեց, որ ավարտվում են մարզի 2՝ Կապանի և Մեղրիի բժշկական կենտրոնների վերակառուցման և կառուցման աշխատանքները: Անդրադառնալով սեփական եկամուտների հավաքագրման գործընթացին՝ մասնավորապես, ցածր ցուցանիշ ունեցող համայնքների ղեկավարներին, հորդորեց քայլեր ձեռնարկել առաջիկա ամիսներին ամբողջությամբ հավաքագրում ապահովելու ուղղությամբ: Մարզպետը հանձնարարեց տասնօրյա ժամկետում ավարտին հասցնել գյուղացիական տնտեսություններին տրամադրված նախորդ տարիների սերմացուի վարձավճարների հավաքագրման գործընթացը:
Անդրադառնալով ներդրումային ծրագրերին ու մարզում դրանց իրականացմանը՝ մարզպետը կարևորեց մարզի զարգացմանն ուղղված ծրագրերի հարցում գյուղական համայնքների ղեկավարների դերը և համագործակցությունը: