Սյունիքի մարզպետի աշխատակազմ

Այսօր մարզպետարանի նիստերի դահլիճում տեղի ունեցավ ՀՀ Սյունիքի մարզխորհրդի հերթական նիստը, որը վարում էր ՀՀ Սյունիքի մարզպետ Սուրիկ Խաչատրյանը:
Նիստին մասնակցում էին ՀՀ Սյունիքի մարզպետի տեղակալ Վ. Գրիգորյանը, մարզպետարանի աշխատակազմի ղեկավար Ռ. Ղազարյանը, մարզպետարանի աշխատակազմի կառուցվածքային ստորաբաժանումների, ինչպես նաև մարզի քաղաքային ու գյուղական համայնքների, հանրապետական գործադիր մարմինների տարածքային ծառայությունների և մարզային ենթակայության կազմակերպությունների ղեկավարներ:
Պետական բյուջեով մարզին և համայնքների բյուջեներին հատկացված միջոցների ընթացիկ ֆինանսավորման և դրանց նպատակային օգտագործման մասին հանդես եկավ ՀՀ Սյունիքի մարզպետարանի աշխատակազմի ֆինանսական և սոցիալ-տնտեսական զարգացման վարչության պետ Հ. Հովհաննիսյանը:
Նշվեց, որ ՀՀ պետական բյուջեից 2015 թվականի նոյեմբերի 23-ի դրությամբ մարզպետարանի աշխատակազմին նախատեսված 524մլն 113 հազար դրամից փաստացի ֆինանսավորվել է 441մլն 899 հազարը կամ 84.3 %: Հ. Հովհաննիսյանի հավաստմամբ, գործընթացն ընթանում է ֆինանսավորման ժամանակացույցին համապատասխան՝ հաշվի առնելով, որ տարվա ավարտին դեռ մեկ ամիս կա:
Պետբյուջեից 2015 թվականին Սյունիքի մարզպետարանին բոլոր ծառայությունների գծով հատկացված գումարները կազմել է 8 մլդ 752 մլն դրամ:
ՀՀ Սյունիքի մարզպետարանի աշխատակազմի հողաշինության և հողօգտագործման բաժին-մարզային հողային պետական տեսչության պետ Մ. Կոստանդյանը խոսեց մարզի համայնքներում հողային պետական տեսչական ստուգումների արդյունքների և անելիքների մասին:Նշվեց, որ ուսումնասիրելով հողհատկացման խնդիրներին վերաբերվող օրենսդրության խախտումներով ընդունված որոշումները ՀՀ գործող օրենսդրությանը համապատասխանեցնելու կամ չեղյալ ճանաչելու նպատակով համայնքների ղեկավարներին տրվել են 28 պարտադիր կատարման ցուցումներ, որոնք կատարվել են ամբողջությամբ: Նշվեց նաև, որ կան համայնքների ավագանիների կայացրած որոշումների սահմանված ժամկետների խախտման դեպքեր, ինչի արդյունքում օպերատիվորեն չի արձագանքվել օրենսդրության խախտումներով կայացված որոշումներին: Մ. Կոստանդյանը համայնքների ղեկավարների ուշադրությունը հրավիրեց վերոնշյալ հարցի վրա:
ՀՀ օրենսդրական և գերատեսչական առանձին իրավական ակտերի և դրանցում կատարված փոփոխությունների մասին տեղեկատվություն ներկայացրեց իրավաբանական բաժնի պետ Ա. Ասրյանը: Հանգամանորեն նշվեց տեղական ինքնակառավարման մարմինների գործունեության ոլորտը կարգավորող ՀՀ օրենսդրական առանձին ակտերում կատարված վերջին փոփոխությունները: Ա. Ասրյանը նաև նշեց, որ որոշ համայնքների ավագանիների ընդունած որոշումներում /Սալվարդ, Բռնակոթ, Անգեղակոթ, Վաղատուր, Տեղ, Լիճք, Նժդեհ, Սյունիք և այլն/ թույլ են տրվել իրավական ակտի օրենսդրական տեխնիկայի կանոնների մի շարք խախտումներ:
Նիստում մարզպետարանի աշխատակազմի ՏԻ և ՀԳՄՀ վարչության պետ Ս. Ավետիսյանը տեղեկատվություն ներկայացրեց <<Տեղական ինքնակառավարման մասին>> ՀՀ օրենքում կատարված փոփոխությունների վերաբերյալ:
Մարզպետի տեղակալ Վ. Գրգորյանը իր խոսքում անդրադարձավ վարչական հսկողության ստուգումների արդյունքում արձանագրված խախտումներին ու դրանց վերացման հետ կապված հարցերին:
Ելույթներով հանդես եկան Տոլորս և Շինուհայր գյուղական համայնքների ղեկավարները:
Ամփոփելով մարզխորհրդի նիստը` ՀՀ Սյունիքի մարզպետ Սուրիկ Խաչատրյանը ներկաների ուշադրությունը հրավիրեց օրակարգային հարցերի շրջանակներում քննարկվող մի շարք այլ խնդիրների վրա: Մասնավորապես, հողային հարաբերությունները և համայնքներում վարչական հսկողության աշխատանքների իրականացումը կարգավորող, պետական և համայնքային սեփականություն հանդիսացող հողերի օտարման և օգտագործման տրամադրման գործընթացների օրենսդրական պահանջների կատարման վրա: Մարզպետը համայնքապետերին հորդորեց հավուր պատշաճի և բարեխիղճ կատարել պետության կողմից իրենց առջև դրված պարտականությունները: Մասնավորապես անդրադառնալով սեփական եկամուտների հավաքագրման գործընթացին՝ նշեց, որ համայնքապետերն այս հարցում առավել ակտիվություն պետք է ցուցաբերեն, հաշվի առնելով, որ տարին ավարտվում է: