Սյունիքի մարզպետի աշխատակազմ

Այսօր ՀՀ Սյունիքի մարզպետարանում անցկացվեց հաշմանդամություն ունեցող անձանց հարցերով զբաղվող Սյունիքի մարզային հանձնաժողովի նիստը, որը վարում էր Սյունիքի մարզպետի տեղակալ Վ. Դավթյանը: Քննարկմանը մասնակցում էին մարզպետարանի աշխատակազմի կառուցվածքային ստորաբաժանումների աշխատակիցներ, <<Ողջի>> հաշմանդամների աջակցության հասարակական և այլ կազմակերպությունների ներկայացուցիչներ, հանրակրթական ուսումնական և այլ հաստատությունների տնօրեններ:
Նիստի օրակարգում ընդգրկված էին <<Տրանսպորտի մատչելիությունը հաշմանդամություն ունեցող անձանց համար>>, <<Մտավոր և հոգեկան հաշմանդամություն ունեցող անձանց ամուսնության ռիսկերի քննարկում>> և <<Հաշմանդամություն ունեցող անձանց զբաղվածության խթանմանն ուղղված ծրագրեր>> հարցերը: Խնդիրների արդյունավետ լուծման ուղղությամբ նիստի մասնակիցները ներկայացրեցին իրենց մտահոգությունները, հանդես եկան առաջարկություններով` ընդգծելով, որ հաշմանդամություն ունեցող անձանց հասարակության մեջ ինտեգրելու համար պետք է կիրառել միջազգային փորձը: ՀՀ Սյունիքի մարզպետի տեղակալ Վ. Դավթյանը նշեց, որ հաշմանդամություն ունեցող անձանց ֆիզիկական մատչելիությունը ապահովելու համար, անհրաժեշտ է համախմբված աշխատանք թե պետական և թե մասնավոր կառույցների հետ: <<Յուրաքանչյուր ոք պետք է իր վերաբերմունքով, աշխատանքով նպաստի, որպեսզի հաշմանդամություն ունեցող անձանց խնդիրները թեթևանան>>,- նշել է Վ. Դավթյանը` հավելելով, որ 2016 թվականը հռչակվել է հաշմանդամություն ունեցող անձանց հիմնախնդիրների լուծման տարի և այս ուղղությամբ համապատասխան աշխատանքներ է տարվելու նաև Սյունիքի մարզում: