Տեղեկատվական կենտրոն
Նորություններ
ԽՈՐՀՐԴԱԿՑՈՒԹՅՈՒՆ՝ ԿՐԹԱԿԱՆ ՀԱՍՏԱՏՈՒԹՅՈՒՆՆԵՐԻ ՂԵԿԱՎԱՐՆԵՐԻ ՄԱՍՆԱԿՑՈՒԹՅԱՄԲ
15.03.2016
ՀՀ Սյունիքի մարզպետարանում մարտի 14-ին տեղի ունեցավ մարզի հանրակրթական դպրոցների տնօրենների խորհրդակցություն՝ գլխավորությամբ մարզպետ Սուրիկ Խաչատրյանի և մարզպետարանի աշխատակազմի կրթության, մշակույթի և սպորտի վարչության պետ Հովիկ Ալեքսանյանի: Խորհրդակցությանը մասնակցում էին Հայաստանի ազգային պոլիտեխնիկական համալսարանի Կապանի մասնաճյուղի տնօրեն Լեռնիկ Պետրոսյանը և Գորիսի պետական համալսարանի նորանշանակ ռեկտոր Արտուշ Ղուկասյանը:
Հանդիպման սկզբում ՀՀ Սյունիքի մարզպետ Սուրիկ Խաչատրյանը ներկայացրեց Գորիսի պետական համալսարանի նորանշանակ ռեկտոր Արտուշ Ղուկասյանին` նշելով, որ վերջինիս կուտակած փորձը և հմտությունները կնպաստեն համալսարանի առջև դրված խնդիրների լուծմանը և վստահություն հայտնեց, որ արդյունավետ աշխատանքի շնորհիվ բուհը կկրկնապատկի իր հաջողությունները:
Խորհրդակցության ընթացքում քննարկվեցին մարզի կրթական հիմնախնդիրներին, հանրակրթական ուսումնական հաստատությունների ու մարզում գործող բուհերի փոխգործակցության ամրապնդմանը, կադրային քաղաքականությանը և առկա բացթողումների բարելավմանն առնչվող հարցեր:
Գորիսի պետական համալսարանի ռեկտոր Ա. Ղուկասյանն անդրադարձավ մասնավորապես գյուղական դպրոցների և հասարակական գործունեության այլ ոլորտների որակյալ կադրերի ապահովման խնդրին` այս առումով կարևորելով նպատակային ընդունելության ծրագրերի իրականացումն ու մանկավարժների վերապատրաստումը:
Հանդիպման ընթացքում կրթական հաստատությունների տնօրեններն առիթ ունեցան իրենց հուզող հարցերն ուղղել նաև մարզի երկու բուհերի ղեկավարներին:
Խորհրդակցության ավարտին մարզպետ Սուրիկ Խաչատրյանը կարևորելով մարզում գործող բուհերի ռազմավարական դերը` նշեց, որ մարզի մասշտաբով կրթական խնդիրների արդյունավետ լուծումը և ոլորտի կատարելագործումը պետք է դառնա այդ բուհերի գործունեության կարևորագույն բաղադրիչներից մեկը: