Սյունիքի մարզպետի աշխատակազմ

ՀՀ Սյունիքի մարզպետարանի նիստերի դահլիճում տեղի ունեցավ դպրոցականների առարկայական օլիմպիադայի մարզային փուլի հաղթողների պարգևատրման արարողությունը: ՀՀ Սյունիքի մարզպետ Սուրիկ Խաչատրյանի կողմից 2015-2016 ուսումնական տարվա դպրոցականների առարկայական օլիմպիադայի մարզային փուլում լավագույն արդյունքներ ցուցաբերած մարզի հանրակրթական դպրոցների 179 աշակերտ արժանացավ դիպլոմի և դրամական պարգևի: Աշակերտներին մրցանակները հանձնեց ՀՀ Սյունիքի մարզպետի տեղակալ Վարդան Դավթյանը: Նա շնորհակալություն հայտնեց մանկավարժներին ու աշակերտներին բարձր ցուցանիշների համար` հույս հայտնելով, որ հաջորդ տարի Սյունիքի մարզում այդ արդյունքները կկրկնապատկվեն:
ՀՀ Սյունիքի մարզպետարանի աշխատակազմի կրթության, մշակույթի և սպորտի վարչության պետ Հովիկ Ալեքսանյանն ամփոփելով օլիմպիադայի արդյունքները, անդրադարձավ նաև օլիմպադայի ընթացքում արձանագրված թերություններին ու բացթողումներին:
Դպրոցականների առարկայական օլիմպիադայի մարզային փուլում առավել ակտիվ են եղել Կապանի թիվ 2 և Գորիսի թիվ 4 ավագ դպրոցների աշակերտները, որոնք զբաղեցրել են համապատասխանաբար 34 և 32 մրցանակային տեղ: Հիմնական դպրոցներից լավագույն արդյունք ցուցաբերել է Կապանի թիվ 7 հիմնական դպրոցը (վեց մրցանակային տեղ): Գյուղական դպրոցներից մարզային փուլում լավագույն արդյունքներ ունեցան Խնձորեսկի, Աճանանի, Սառնակունքի միջնակարգ դպրոցների աշակերտները: