Տեղեկատվական կենտրոն
Նորություններ
ՏՈՆԱԿԱՆ ՄԻՋՈՑԱՌՈՒՄՆԵՐ` ՆՎԻՐՎԱԾ ԵՐԵԽԱՆԵՐԻ ԻՐԱՎՈՒՆՔՆԵՐԻ ՊԱՇՏՊԱՆՈՒԹՅԱՆ ՄԻՋԱԶԳԱՅԻՆ ՕՐՎԱՆ
01.06.2016
Երեխաների իրավունքների պաշտպանության միջազգային օրվա կապակցությամբ ՀՀ Սյունիքի մարզպետի տեղակալ Վարդան Դավթյանը մարզպետարանի աշխատակազմի ներկայացուցիչների հետ Կապանում ներկա է գտնվել երեխաների օրվան նվիրված միջոցառումներին:
Տոնի առթիվ ՀՀ Սյունիքի մարզպետ Սուրիկ Խաչատրյանի շնորհավորանքը երեխաներին փոխանցեց ՀՀ Սյունիքի մարզպետարանի աշխատակազմի ընտանիքի, կանանց և երեխաների իրավունքների պաշտպանության բաժնի պետ Աննա Ոսկանյանը:
Օրվա կապակցությամբ մարզպետի կողմից դրամական աջակցություն ստացան մարզի առանց ծնողական խնամքի մնացած 15 ու քառօրյա պատերազմի ընթացքում զոհված սյունեցի կամավորականների 2 անչափահաս երեխաներ:
Մանուկների տոնը հիշարժան դարձնելու համար մարզի քաղաքային համայնքներում վաղ առավոտից մեկնարկել էին բազմաբնույթ միջոցառումներ: Օրը հագեցած էր թատերական, երաժշտական ու մարզական իրադարձություններով: Տարբեր համույթների կողմից տեղի ունեցան մանկական երգ ու պարի բազմաժանր կատարումներ: Հունիսմեկյան միջոցառումները շարունակվելու են մինչև երեկո: