Սյունիքի մարզպետի աշխատակազմ

 ՀՀ Սյունիքի մարզպետ Սուրիկ Խաչատրյանի մոտ այսօր տեղի ունեցավ հերթական աշխատանքային խորհրդակցությունը, որին մասնակցում էին մարզպետի տեղակալները և մարզպետարանի աշխատակազմի կառուցվածքային ստորաբաժանումների ղեկավարները:
Մինչ օրակարգային հարցերին անցնելը, մարզպետը շնորհավորեց ՀՀ Սյունիքի մարզպետարանի աշխատակազմի ղեկավար Ռուդոլֆ Սարգսյանին և առողջապահության և սոցիալական ապահովության վարչության առողջապահության բաժնի պետ Արմեն Թադևոսյանին՝ պատասխանատու պաշտոններն ստանձնելու կապակցությամբ և մաղթել հաջողություններ:
Խորհրդակցության ընթացքում քննարկվեցին մարզի սոցիալ-տնտեսական զարգացման ծրագրի 2016 թվականի տարեկան աշխատանքային պլանի մոնիտորինգի և գնահատման առաջին կիսամյակի հաշվետվության և մարզի տնտեսության դիվերսիֆիկացիայի ծրագրի իրականացման ուղղությամբ կատարված աշխատանքների, ինչպես նաև մարզում իրականացվող քաղաքաշինական ծրագրերի, տեղական ինքնակառավարման մարմինների ընտրությունների անցկացման ընթացքի վերաբերյալ հարցեր:
Քաղաքաշինության վարչության պետ Ռազմիկ Ավետիսյանը ներկայացրեց տեղեկություններ Մեղրիի թիվ 1 դպրոցի և Ագարակի միջնակարգ դպրոցի կցակառույցի վերանորոգման աշխատանքների ընթացքի մասին: Մարզպետը հետաքրքրվեց Սիսիանի Զախար Խաչատրյանի և Արտաշես Հովսեփյանի տուն-թանգարանների վերանորոգման քաղաքաշինական նախագծանախահաշվային փաստաթղթերի կազմման և Կապանի Դավիթ Համբարձումյանի անվան մարզադպրոցի հատակի վերանորոգման համար հայտարարված մրցույթների ընթացակարգերով:
ՏԻ և ՀԳՄՀ վարչության պետ Սեյրան Ավետիսյանը ներկայացրեց տեղեկատվություն` մարզում օրենսդրությամբ սահմանված կարգով կատարված համայնքների խոշորացման վերաբերյալ: <<ՀՀ վարչատարածքային բաժանման մասին>> ՀՀ օրենքում կատարված փոփոխության արդյունքում ձևավորվել են 4 նոր խոշորացված համայնքներ՝ Գորիս, Տեղ, Մեղրի և Գորայք: ՏԻՄ օրենքում կատարված վերջին փոփոխության արդյունքում վերոնշյալ համայնքներում սույն թվականի սեպտեմբերի 18-ին նշանակվել են ՏԻՄ ընտրություններ, իսկ սույն թվականի հուլիսի 10-ին Դարբաս և Ախլաթյան համայնքներում անցկացվելու են համայնքի ղեկավարի արտահերթ ընտրություններ: Մարզպետին ներկայացվեց ընտրությունների անցկացման գործընթացի վերաբերյալ տեղեկատվություն և նշվեց, որ մարզպետարանին և համայնքների ղեկավարներին ընտրական օրենսգրքով վերապահված բոլոր գործառույթներն իրականացվել են:
Քննարկվեցին նաև առաջիկա մի շարք միջոցառումների կազմակերպչական հարցեր, տրվեցին համապատասխան հանձնարարականներ: