Տեղեկատվական կենտրոն
Նորություններ
ՀՀ ՍՅՈՒՆԻՔԻ ՄԱՐԶՊԵՏԻ ՏԵՂԱԿԱԼ ՎԱՐԴԱՆ ԴԱՎԹՅԱՆԸ ՀԱՆԴԻՊՈՒՄ Է ՈՒՆԵՑԵԼ ՄԱԿ-ի ՊԱՐԵՆԻ ՀԱՄԱՇԽԱՐՀԱՅԻՆ ԿԱԶՄԱԿԵՐՊՈՒԹՅԱՆ ՀԱՅԱՍՏԱՆՅԱՆ ԳՐԱՍԵՆՅԱԿԻ ՆԵՐԿԱՅԱՑՈՒՑԻՉՆԵՐԻ ՀԵՏ
24.08.2016
ՀՀ Սյունիքի մարզպետի տեղակալ Վարդան Դավթյանն այսօր ընդունել է ՄԱԿ-ի Պարենի համաշխարհային կազմակերպության հայաստանյան գրասենյակի արտակարգ պատրաստվածության և արձագանքման սպաներ Յիեն Աջեմյանին և Արտակ Ոսկանյանին: Հանդիպմանը մասնակցում էին նաև ՀՀ Սյունիքի մարզպետարանի աշխատակազմի Տեղական ինքնակառավարման և հանրապետական գործադիր մարմինների հարցերով վարչության պետ Սեյրան Ավետիսյանը, Զարգացման ծրագրերի և վերլուծության բաժնի պետ Էդգար Մարտիրոսյանը, Սյունիքի մարզային փրկարարական վարչության պետ Բագրատ Զաքարյանը:
Քննարկվեցին Պարենի համաշխարհային կազմակերպության մանդատի շրջանակներում իրականացվող ծրագրերի և միջոցառումների անցկացման հետ առնչվող հարցեր: Մասնավորապես, ներկայացվեցին մարզում արտակարգ իրավիճակներում անհրաժեշտ մարդասիրական օգնության տրամադրման, արագ արձագանքման կարողությունների կատարելագործման, աղետների ռիսկերի նվազեցմանն ուղղված միջոցառումների լայն շրջանակ և դրանց անցկացման հետ կապված հարցեր, ինչպես նաև անհրաժեշտության դեպքում դրանք կյանքի կոչելու հնարավորությունները: Մարզում իրականացված աղետների ռիսկերի նվազեցմանն ուղղված աշխատանքների, պատրաստվածության մակարդակի և ոլորտում առկա խնդիրների վերաբերյալ տեղեկատվություն ներկայացրեց Սյունիքի մարզային փրկարարական վարչության պետ Բ.Զաքարյանը: Քննարկման ընթացքում եղան նաև առաջարկություններ:
Յիեն Աջեմյանը նշեց, որ արտակարգ իրավիճակների դեպքում ՄԱԿ-ը պատրաստակամ է աջակցելու պետական մարմիններին անհրաժեշտ մարդասիրական օգնության տրամադրման հարցում, մասնավորապես սննդի տրամադրման, տեղափոխման և կապի ապահովման հարցերում:
Վարդան Դավթյանն իր խոսքում կարևորել է կազմակերպության հետ համագործակցությունը և նշել մարզում մարդածին և բնական աղետների ժամանակ տարբեր կառույցների հետ համագործակցության անհրաժեշտությունը: Հանդիպման վերջում մարզպետի տեղակալը շնորհակալություն է հայտնել կազմակերպությանը` իր մանդատի շրջանակներում նման ծրագրեր իրականացնելու համար: