Սյունիքի մարզպետի աշխատակազմ

 Այսօր Կապանի մշակույթի կենտրոնի դահլիճում տեղի ունեցավ կրթության ոլորտի աշխատողների ավանդական դարձած օգոստոսյան ամենամյա խորհրդակցությունը, որը վարում էր ՀՀ Սյունիքի մարզպետ Սուրիկ Խաչատրյանը: Խորհրդակցությանը մասնակցում էր ՀՀ կրթության և գիտության նախարարության կրթության պետական տեսչության պետ Արամ Կարապետյանը, մարզպետարանի աշխատակազմի կառուցվածքային ստորաբաժանումների և քաղաքային համայնքների ղեկավարներ, մարզի կրթական հաստատությունների տնօրեններ և մանկավարժներ:
Խորհրդակցությանը բացման խոսքով հանդես եկավ ՀՀ Սյունիքի մարզպետ Ս. Խաչատրյանը:
Մարզի կրթական համակարգի 2015-2016 ուսումնական տարում հանրակրթության ոլորտում իրականացված աշխատանքների, առկա խնդիրների և նոր ուսումնական տարվա անելիքների մասին զեկուցումով հանդես եկավ ՀՀ Սյունիքի մարզպետարանի աշխատակազմի կրթության, մշակույթի և սպորտի վարչության պետ Հովիկ Ալեքսանյանը: Նա իր ելույթում խոսեց կրթության ոլորտի ձեռքբերումների ու բացթողումների մասին: Նշվեց.որ 2015-2016 ուստարին իր արդյունավետությամբ և բազմաթիվ խնդիրներով ու դրանց լուծման ուղղությամբ կատարված աշխատանքներով հիմք է տալիս բարձրաձայնելու, որ համակարգն աշխատել է մեծ պատասխանատվությամբ ու արդյունավետ: Մարզում գործող 120 հանրակրթական ուսումնական հաստատություններում, որոնցից 114-ը՝ մարզպետարանի ենթակայության, 6-ը՝ նախարարության, սովորում են 16431 աշակերտ, աշխատողների թիվը կազմում է 3681, մանկավարժներինը՝ 2225, մանկավարժական բարձրագույն կրթությամբ՝ 1932, թերի բարձրագույն կրթությամբ՝ 16, միջին մասնագիտական կրթությամբ՝ 277 մանկավարժ: Մարզպետարանի ենթակայության ուսումնական հաստատություններում կոմպլեկտավորվել են 1025.5 դասարան՝ 14428 սովորողներով, իսկ Սյունիքի մարզը գերազանցության մեդալների թվով հանրապետությունում առաջինն է:
Խոսելով կրթության ոլորտի բարեփոխումների և զարգացման ծրագրերի հաջողության ու արդյունավետության մասին՝  Հ. Ալեքսանյանը նշեց, որ դրանք մեծապես պայմանավորված են մանկավարժների մասնագիտական պատրաստվածությամբ, կրթական նվաճումներ արձանագրելու և կյանքի կոչելու նրանց պատասխանատվությամբ ու հավակնություններով, ինչպես նաև կադրերի խելացի ու ճիշտ ընտրությամբ: Վարչության պետն ընդգծեց, որ ունեն ոչ միայն որակյալ կադրերի պակաս, այլև ընդհանրապես կադրերի լուրջ պահանջ կա մաթեմատիկա, ֆիզիկա, ինֆորմատիկա, աշխարհագրություն, ռուսաց լեզու առարկաների գծով, մանավանդ գյուղական դպրոցներում:
Հ. Ալեքսանյանը, խոսելով առաջադեմ և ստեղծագործ մանկավարժների բացահայտման, խրախուսման, զարգացման և բարեփոխումների գործընթացների մասին, կարևորեց նրանց ներգրավվածության ակտիվության խնդիրը:
Իրենց կրթական հաստատություններում առկա հիմնախնդիրների և հաջողությունների մասին ելույթներով հանդես եկան նաև մարզի բարձրագույն, միջին մասնագիտական և հանրակրթական ուսումնական հաստատությունների ղեկավարներ:
Հանրակրթության ոլորտում տեղի ունեցող փոփոխությունների, ինչպես նաև համակարգի զարգացման հետագա խնդիրների, մասնավորապես, ավագ դպրոցների հիմնախնդիրների, դպրոց-բուհ փոխհարաբերությունների և կրթական բարեփոխումների և մի շարք այլ հարցերի մասին պարզաբանումներով հանդես եկավ ՀՀ կրթության և գիտության նախարարության կրթության պետական տեսչության պետ Արամ Կարապետյանը:
Խոսվեց նաև կրթական մի շարք այլ հարցերի մասին, մասնավորապես, գյուղական դպրոցի նկատմամբ պետական կրթական առանձին քաղաքականության իրականացման անհրաժեշտության և այն փորձնական ծրագրերի մասին, որին մասնակցել են մարզի մի շարք դպրոցներ, հատուկ կրթական և կրթության առանձնահատուկ պայմանների կարիք ունեցող երեխաներին հանրակրթական համակարգում ինտեգրելու գործընթացի, տեղեկատվական հաղորդակցման տեխնոլոգիաների լայն կիրառման, դասագրքերի իրացման համակարգի, <<Կայուն դպրոցական սնունդ>> ծրագրի շրջանակներում տարրական դասարանների աշակերտներին տաք սննդի տրամադրման շարունակականության և տրամադրված խոհանոցային տեխնիկական սարքավորումների շահագործմանը վերաբերող և այլն:
Ամփոփելով խորհրդակցությունը` ՀՀ Սյունիքի մարզպետ Ս. Խաչատրյանը կարևորեց մարզում կրթության որակի բարձրացմանն ուղղված հետևողական ու կառուցողական աշխատանքները և սերունդների կրթության ու դաստիարակության գործում մանկավարժների դերը և իր երախտագիտությունը հայտնեց մեդալակիր շրջանավարտներներ տված կրթօջախների տնօրեններին: Մարզպետը գոհունակությամբ նշեց, որ մարզի կրթական ոլորտում արձանագրված արդյունքները թույլ են տալիս ասելու, որ տարեցտարի ավելանում են ոլորտի ձեռքբերումները և համոզմունք հայտնեց, որ հաջորդող տարիներին արդյունքներն էլ ավելի գոհացուցիչ կլինեն: Մարզպետ Ս. Խաչատրյանը մատաղ սերնդի դաստիարակության գործում ներդրած ավանդի, երկարամյա անբասիր մանկավարժական գործունեության համար շնորհակալագրերով պարգևատրեց առարկայական օլիմպիադայի հանրապետական փուլում առաջին կարգի մրցանակների արժանացած աշակերտների ուսուցիչներին:
Մարզպետն անդրադարձավ նաև մարզի մի շարք գյուղական դպրոցների երթևեկող ուսուցիչների տրանսպորտի և կադրերի պահանջարկի խնդրի կարգավորմանն ուղղված աշխատանքներին:
Խորհրդակցության ավարտին մարզի ղեկավարը շնորհավորեց ներկաներին նոր ուսումնական տարվա մեկնարկի կապակցությամբ՝ մաղթելով նրանց հաջողություններ և նորանոր ձեռքբերումներ: