Տեղեկատվական կենտրոն
Նորություններ
ՄԱՐԶՊԵՏՆ ԱՇԽԱՏԱՆՔԱՅԻՆ ԱՅՑՈՎ ՄԵՂՐԻԻ ՏԱՐԱԾԱՇՐՋԱՆՈՒՄ ԷՐ
08.09.2016
ՀՀ Սյունիքի մարզպետ Սուրիկ Խաչատրյանն աշխատանքային այց է կատարել Մեղրիի տարածաշրջան: Այցի շրջանակներում մարզի ղեկավարը եղավ տարածաշրջանի մի շարք կրթական ու նախադպրոցական ուսումնական հաստատություններում: Մարզպետը Մեղրիի ու Ագարակի քաղաքապետեր Արշավիր Հովհաննիսյանի և Մխիթար Զաքարյանի ուղեկցությամբ նախ այցելեց Մեղրիի թիվ 1 միջնակարգ դպրոց, ուր տնօրեն Սիմոն Սարգսյանի ուղեկցությամբ շրջել է դպրոցի մասնաշենքի տարածքում, ծանոթացել պետական բյուջեով անցյալ տարվանից մեկնարկած դպրոցի վերանորոգման աշխատանքներին, հետաքրքրվել դպրոցի խնդիրներով: Մարզպետ Ս. Խաչատրյանը հանձնարարեց սեղմ ժամկետում լուծում տալ կրթօջախի գույքի խնդրին:
Մեղրիի թիվ 1 միջնակարգ դպրոցում մարզպետ Սուրիկ Խաչատրյանը հանդիպել է աշակերտներին ու մանկավարժներին, շնորհավորել նոր ուսումնական տարվա մեկնարկի կապակցությամբ, բարեմաղթանքի խոսքեր հղել: Կրթօջախի աշխատակիցների հետ հանդիպման ընթացքում մարզպետը զրուցել է նրանց հետ, ծանոթացել հուզող խնդիրներին, լսել նրանց կարծիքներն ու առաջարկությունները, պատասխանել հարցերին: Հանդիպման ընթացքում անդրադարձ է եղել նաև վարչատարածքային բարեփոխումների իրականացման շրջանակում համայնքների խոշորացման գործընթացին վերաբերող հարցերի:
Մարզի ղեկավարն այնուհետև այցելել է Ագարակի միջնակարգ դպրոց, որտեղ ծանոթացել է ուսումնական գործընթացին, ինչպես նաև դպրոցին կից կառուցված նորաբաց մասնաշենքի շենքային պայմաններին: Այստեղ նույնպես կար գույքի պակասի խնդիր, այն մարզպետի հանձնարարությամբ առաջիկայում լուծում կստանա:
Մարզպետ Ս. Խաչատրյանը Լեհվազի նախակրթարանում ու դպրոցում զրուցել է մանկավարժների և աշակերտների հետ, ծանոթացել կրթական գործընթացին, առկա խնդիրներին:
Մեղրիի տարածաշրջան կատարած աշխատանքային այցի ընթացքում Սուրիկ Խաչատրյանը հանդիպել է նաև բնակիչներին, զրուցել նրանց հետ, լսել վերջիններիս մտահոգությունները:
Հանդիպման շրջանակում մարզպետին ներկայացվել է նաև տարածաշրջանի կրթական հաստատություններում իրականացվող աշխատանքների ընթացքը: