Տեղեկատվական կենտրոն
Նորություններ
ՀՀ ՍՅՈՒՆԻՔԻ ՄԱՐԶՊԵՏ ՎԱՀԵ ՀԱԿՈԲՅԱՆՆ ԱՆՑԿԱՑՐԵՑ ԱՇԽԱՏԱՆՔԱՅԻՆ ԽՈՐՀՐԴԱԿՑՈՒԹՅՈՒՆ
11.10.2016
ՀՀ Սյունիքի մարզպետ Վահե Հակոբյանն այսօր անցկացրեց առաջին աշխատանքային խորհրդակցությունը՝ մարզպետարանի աշխատակազմի կառուցվածքային բոլոր ստորաբաժանումների ղեկավարների և աշխատակիցների մասնակցությամբ:
Հանդիպում-խորհրդակցությունն ուներ ավելի շատ ճանաչողական բնույթ: Մարզպետարանի աշխատակազմի ստորաբաժանումների ղեկավարները հանդես եկան հաշվետվություններով: Համապատասխան ոլորտների պատասխանատուները նախ ներկայացրեցին վարչությունների ու բաժինների գործառույթներն ու պարտականությունները, այնուհետև ըստ ոլորտների՝ տեղեկատվություն ներկայացրեցին իրենց ստորաբաժանումների ընթացիկ տարվա գործունության վերաբերյալ:
Մարզպետ Վահե Հակոբյանը խոսել է աշխատանքային նոր մոտեցումների, մարզում մի շարք կարևոր ծրագրերի իրականացման և առկա խնդիրների մասին՝ նախանշելով առաջիկա և հետագա անելիքները: Այնուհետև տեղի ունեցավ մտքերի փոխանակություն, ստորաբաժանումների ղեկավարները ներկայացրեցին իրենց մտահոգություններն ու խնդիրները:
Քննարկվեցին մարզում առաջնահերթ լուծում պահանջող խնդիրներին վերաբերող հարցեր: Ոլորտային մի շարք հարցեր մարզպետն առաջարկեց քննարկել առանձին՝ այլ ձևաչափով հանդիպումների ընթացքում:
Մարզի ղեկավարը հետաքրքրվել է մարզի բնակչության զբաղվածության խնդրով, հողային հարաբերությունների կարգավորման, մարզում հաշվառված որդեգրման ենթակա և մանկատներում գտնվող մարզի երեխաների, խոշորացված համայնքներում աշխատակազմերի կազմավորման, քաղաքացիների ընդունելության անցկացման նոր ձևաչափի, սեփական եկամուտների հավաքագրման և բյուջեի կատարողականի հետ կապված հարցերով:
Անդրադարձ եղավ բուժհաստատությունների կադրերի համալրման, մարզի գիշերօթիկ հաստատությունների վերակազմավորման գործընթացին, ինչպես նաև մարզի լավագույն արդյունքներ ցուցաբերած ու հաջողություններ արձանագրած դպրոցականներին և ուսանողներին խրախուսելու, նրանց՝ արտասահմանում ուսումնառության նպատակով անվանական կրթաթոշակներ սահմանելու, հանրային և երիտասարդական խորհուրդների ստեղծման, տեղեկատվական տեխնոլոգիաների ներդրմանն առնչվող մի շարք հարցերի:
ՀՀ Սյունիքի մարզպետ Վահե Հակոբյանի հանձնարարությամբ արդեն իսկ առաջիկա օրերին լուծում կստանան խորհրդակցության ընթացքում բարձրացված օրախնդիր մի շարք հարցեր: