Տեղեկատվական կենտրոն
Նորություններ
ՀՀ ՍՅՈՒՆԻՔԻ ՄԱՐԶՊԵՏ ՎԱՀԵ ՀԱԿՈԲՅԱՆԸ ՄԱՍՆԱԿՑԵԼ Է ՄԱՆԿԱՎԱՐԺ ՌՈԲԵՐՏ ԳՐԻԳՈՐՅԱՆԻ ՀԻՇԱՏԱԿԻՆ ՆՎԻՐՎԱԾ ՄԻՋՈՑԱՌՄԱՆԸ
01.11.2016
ՀՀ Սյունիքի մարզպետ Վահե Հակոբյանը Կապանի Ալ. Շիրվանզադեի անվան պետական դրամատիկական թատրոնում մասնակցել է Լեռնաձորի հիմնական դպրոցի երակարամյա տնօրեն, անվանի մանկավարժ Ռոբերտ Գրիգորյանի (Էջանանցի) 70-ամյակին նվիրված հիշատակի միջոցառմանը: Ներկա էին համայնքային ու մարզային իշխանությունների ներկայացուցիչներ, Ռոբերտ Գրիգորյանի հարազատները, աշակերտները, ընկերները:
ՀՀ Սյունիքի մարզպետ Վահե Հակոբյանն իր խոսքում նշեց, որ Ռոբերտ Գրիգորյանի՝ Էջանանցու նման մարդկանց վրա է հիմնված պետությունը:
<<Նա, որպես մանկավարժ, կարող էր ցանկացած պահի դասավանդել մայրաքաղաքի ցանկացած համալսարանում և մեծ բարձունքների հասնել, բայց նա, չդավաճանելով իր սկզբունքներին, մինչև կյանքի վերջը մնաց գյուղում ու դասավանդեց հարազատ կրթօջախում: Մենք պետք է արժանի լինենք այն ժառանգությանը, որը թողեց մեզ Էջանանցին>>,- իր խոսքում նշեց Վահե Հակոբյանը:
Մարզպետը տեղեկացրեց, որ 2017 թվականից գործելու է <<Սյունիքի զարգացման հիմնադրամը>>, որը սահմանելու է <<Ռոբերտ Գրիգորյանի>> անվանական կրթաթոշակ բարձրագույն ուսումնական հաստատություններում սովորող սյունեցի լավագույն ուսանողների համար: Վահե Հակոբյանը նշեց նաև, որ առաջիկայում Սյունիքի մարզպետարանի նախաձեռնությամբ իրականացվելու է նաև Էջանանցու երազանքը, այն է՝ նրա հարազատ դպրոցի շրջակայքում կկանգնեցվի բաց գրքի տեսքով հուշակոթող:
Էջանանցու 70-ամյակին նվիրված հիշատակի միջոցառմանը ներկայացվեց նրան նվիրված տեսաֆիլմ, հնչեցին մեծարանքի ու գնահատանքի խոսքեր, նրան ճանաչողները կիսվեցին իրենց հուշերով: