Սյունիքի մարզպետի աշխատակազմ

 Սյունիքի մարզպետ Վահե Հակոբյանը, Սիսիանի քաղաքապետ Արթուր Սարգսյանի ուղեկցությամբ, այցելեց Հայաստանի ազգային պատկերասրահի մասնաճյուղի Սիսիան քաղաքի Սպանդարյան 16 հասցեում գտնվող նշանավոր նկարիչ Զաքար Խաչատրյանի և հայտնի քանդակագործ Արտաշես Հովսեփյանի տուն-թանգարան՝ տեղում ծանոթանալու շենքի՝ վերջերս սկսված հիմնանորոգման աշխատանքներին, որն իրականություն է դարձել ՀՀ մշակույթի նախարարության ֆինանսավորմամբ:
Հիմնանորոգման աշխատանքներն իրականացնող <<Նորոգշին (Նոր բակ)>> շինարարական կազմակերպության ղեկավար Մարատ Ասլանյանը մարզպետին և քաղաքապետին ներկայացրեց կատարվող աշխատանքների ծավալը, առկա խնդիրները, կարևորեց նախագծա-նախահաշվային փաստաթղթերով նախատեսվող նոր ցուցասրահի կառուցման համար լրացուցիչ ֆինանսական աղբյուրների հայթայթումը:
Տուն-թանգարանի վարիչ Արևհատ Ամիրյանը մարզպետ Վահե Հակոբյանին և Սիսիանի քաղաքապետ Արթուր Սարգսյանին ներկայացրեց ՌԴ և ՀՀ ժողովրդական նկարիչ Զաքար Խաչատրյանի և ՀՀ ժողովրդական նկարիչ, քանդակագործ Արտաշես Հովսեփյանի անգնահատելի դերը մասնավորաբար 20-րդ դարակեսին Սիսիանում մշակութային կյանքը զարգացնելու գործում: Մասնաճյուղի վարիչը ծանոթացրեց այս տանը անցյալ դարի 60-ական թվականներին հիմնադրված մանկական արվեստի ստուդիայի գործունեությանը, որը Մերկուրովի և Կոջոյանի արվեստի ստուդիաներից հետո երրորդն էր հանրապետությունում:
Սյունիքի մարզպետն ու Սիսիանի քաղաքապետը պատրաստակամություն հայտնեցին աջակցել տուն-թանգարանի հիմնանորոգման աշխատանքներն ավարտին հասցնելուն: Այն, պատասխանատուների հավաստմամբ, կարող է դառնալ մշակութային կենտրոն և հանգստի գոտի ոչ միայն Սիսիանի համար, այլև՝ մարզի: Զբոսաշրջությունը Սիսիանում զարգացնելու համար կարևորեցին տուն-թանգարանը ապագայում Զորաց Քարեր-Տաթև-Արցախ տուրիստական երթուղիներում ներգրավելու հնարավորությունները: