Տեղեկատվական կենտրոն
Նորություններ
ՀՀ ՍՊՈՐՏԻ ԵՎ ԵՐԻՏԱՍԱՐԴՈՒԹՅԱՆ ՀԱՐՑԵՐԻ ՆԱԽԱՐԱՐԸ ԱՇԽԱՏԱՆՔԱՅԻՆ ԱՅՑ ԿԱՏԱՐԵՑ ՍՅՈՒՆԻՔ
28.11.2016
Նոյեմբերի 28-ին ՀՀ սպորտի և երիտասարդության հարցերի նախարար Հրաչյա Ռոստոմյանի գլխավորած պատվիրակությունն աշխատանքային այցով Սյունիքի մարզում էր: Նախարարի այցը մեկնարկեց ՀՀ Սյունիքի մարզպետարանում կայացած խորհրդակցությամբ: ՀՀ Սյունիքի մարզպետի տեղակալ Վարդան Դավթյանը մարզպետի անունից ողջունելով նախարարին ու նրան ուղեկցող պատվիրակությանը, ներկայացրել է մարզում ֆիզիկական կուլտուրայի ոլորտում առկա իրավիճակը: Մասնավորապես անդրադարձ կատարվեց դպրոցների մարզադահլիճների շենքային պայմանների բարելավմանն ու մարզագույքի տրամադրմանը: Վարդան Դանթյանը նաև նշեց, որ մարզպետ Վահե Հակոբյանի նախաձեռնությամբ վերակազմավորվում է մարզպետին կից երիտասարդական խորհուրդը, որը խթան կդառնա երիտասարդության խնդիրների բարձրացմանն ու հրատապ լուծում տալուն:
Նախարար Հրաչյա Ռոստոմյանը ներկայացրել է մարզերում զանգվածային սպորտի և առողջ ապրելակերպի, ֆիզիկական կուլտուրայի զարգացման ուղղությամբ իրականացվող նախարարության ծրագրերը: Սյունիք կատարած աշխատանքային այցի ընթացքում նախարարը եղավ նաև Կապանի Դավիթ Համբարձումյանի անվան մանկապատանեկան մարզադպրոցում, Կապանի և Քաջարանի հանրակրթական դպրոցներում:
ՀՀ սպորտի և երիտասարդության հարցերի նախարար Հրաչյա Ռոստոմյանի այցը եզրափակվեց մարզի սպորտի ոլորտի պատասխանատուների, մարզադպրոցների տնօրենների, մարզիչ-մանկավարժների, ավագ և հիմնական դպրոցների ֆիզիկական կուլտուրայի ուսուցիչների մասնակցությամբ անցկացված աշխատանքային խորհրդակցությամբ: