Տեղեկատվական կենտրոն
Նորություններ
ԴԱՐԲԱՍՈՒՄ ԲԱՑՎԵՑ ՄԱՅԻՍ ՄԻՐԶՈՅԱՆԻ ԱՆՈՒՆԸ ԿՐՈՂ ՀՐԱՊԱՐԱԿ
31.05.2017
Մարզպետ Վահե Հակոբյանն այցելել է Սիսիանի տարածաշրջանի Շամբ և Դարբաս բնակավայրերը ընդգրկող Դարբաս համայնք, որտեղ մասնակցել է ապրիլյան քառօրյա պատերազմում զոհված, Դարբասի նախկին համայնքապետ Մայիս Միրզոյանի անունը կրող հրապարակի բացման հանդիսավոր արարողությանը: <<Դարբաս-Ըղվերձ>> հայրենակցական հասարակական կազմակերպության հանգանակությամբ և համայնքապետարանի միջոցներով Շամբ բնակավայրում կառուցվել է Մայիս Միրզոյանի անունը կրող հրապարակ, որտեղ կանգնեցվել է նաև խաչքար-հուշարձան՝ նվիրված արցախյան պատերազմում զոհված հերոսների հիշատակին: Անվանակիր հրապարակի ցուցանակի հանդիսավոր բացման պատիվը վերապահվել է Մայիս Միրզոյանի որդուն՝ Հայկ Միրզոյանին, իսկ հրապարակի կարմիր ժապավենը կտրեցին մարզի ղեկավարն ու Դարբասի համայնքապետ Սաշա Ստեփանյանը: Սյունյաց թեմի առաջնորդական տեղապահ Հոգեշնորհ տեր Մակար վարդապետ Հակոբյանի ձեռամբ կատարվեց խաչքարի օրհնության կարգ:
Իր խոսքում մարզպետ Վահե Հակոբյանը նշել է, որ յուրաքանչյուր ոք պետք է գլուխ խոնարհի հերոսաբար զոհված մեր տղաների հիշատակի առջև, և ընգծել, որ Մայիս Միրզոյանի անունը կրող հրապարակը այսուհետ ուխտատեղի է դառնալու ոչ միայն սյունեցիների, այլև համայն հայության համար:
Դարբասի համայնքապետարանը կազմակերպել էր նաև ոգեկոչման միջոցառում՝ նվիրված քառօրյա պատերազմում զոհված հերոսների հիշատակին: