Տեղեկատվական կենտրոն
Նորություններ
Անցկացվեց ՀՀ Սյունիքի մարզխորհրդի նիստը
20.02.2018
Այսօր Սյունիքի մարզպետարանում տեղի ունեցավ Սյունիքի մարզխորհրդի այս տարվա առաջին նիստը, որը վարում էր ՀՀ Սյունիքի մարզպետ Վահե Հակոբյանը: Նիստին ներկա էին մարզպետարանի աշխատակազմի կառուցվածքային ստորաբաժանումների պատասխանատուները, մարզի համայնքների ղեկավարներ ու ավագանիներ, հանրապետական գործադիր մարմինների տարածքային ծառայությունների, ԶԼՄ-ների, հասարակական կազմակերպությունների ներկայացուցիչներ և այլք: Օրակարգում ընդգրկված հարցերի շրջանակներում ՀՀ Սյունիքի մարզպետարանի աշխատակազմի ղեկավար Ռ. Սարգսյանը ներկայացրեց ՀՀ Սյունիքի մարզպետի 2017թ. գործունեության և մարզի սոցիալ-տնտեսական վիճակի մասին հաշվետվությունը: Նշվեց, որ 2017 թվականին մարզի բոլոր համայնքներում, նախնական տվյալներով իրականացվել են շուրջ 44.74 մլրդ. դրամի զարգացման, ներդրումային և վարկային ծրագրեր: Մարզի առջև ծառացած խնդիրների լուծման, փոքր և միջին ձեռնարկատիրության աջակցման և մարզի սոցիալ-տնտեսական վիճակի բարելավման նպատակով, ՀՀ կառավարության որոշմամբ ստեղծվել է «Սյունիքի մարզի զարգացման և ներդրման» հիմնադրամը: Հիմնադրամը 2017թ. իրականացրել է մոտ 390.0 մլն. ներդրումային ծրագրեր, որից` առողջապահության ոլորտում 16.8 մլն դրամ, կրթության ոլորտում` 51.2 մլն. դրամ, մշակույթ` 20.0 մլն.դրամ, սոցիալական` 88.7 մլն. դրամ, քաղաքաշինություն` 87.0 մլն. դրամ, համայնքներին ցուցաբերված օգնությունը` 75.5 մլն. դրամ և այլն: Մարզպետի անմիջական նախաձեռնությամբ զգալի ներդրումներ են ներգրավվել Կապանի օդանավակայանի վերագործարկման պիցցայի արտադրության կազմակերպման ժամանակակից կինոթատրոնի և բրենդային հագուստի խանութի բացման ուղղությամբ:
2017 թվականի ընթացքում ՀՀ պետական բյուջեից մարզին հատկացված միջոցների ֆինանսավորումը կազմել է 99.4%, այդ թվում դոտացիաները` 100%: Համայնքների բյուջեներն ընդհանուր եկամուտների մասով կա¬տար¬վել են 100.4%, իսկ սեփա¬կան եկամուտները ՝ 102.4%:
Անդրադառնալով <<Մաքուր Հայաստան>> ծրագրի շրջանակներում իրականացված աշխատանքներին, նշվեց, որ մարզի տարածքում գույքագրած 137 աղբավայրերց մինչև տարեվերջ վերացվել է 83-ը: Տնտեսվարող սուբյեկտների հետ կնքված պայմանագրերի թիվը 1620-ից հասցվել է 1862-ի:
Գյուղատնտեսության ոլորտում, ըստ արձանագրված արդյունքների, 2017թ. ընթացքում մարզում գյուղատնտեսությամբ զբաղվել են 18050 գյուղացիական և ֆերմերային տնտեսություններ, գյուղատնտեսական մթերքների վերամշակմամբ և արտադրությամբ` 60 կազմակերպություններ: Կատարվել է աշնանացան` 11058.3հա, նախորդից` 535.3հա-ով ավել, 5278.7 հա գարնանացան հացահատիկային մշակաբույսերի ցանքս: Տարվա ընթացքում տեխնիկայի բազան որոշակի քանակությամբ թարմացվել է. ձեռք է բերվել 2 միավոր կոմբայն և 24 միավոր տրակտոր՝ իրենց գյուղգործիքներով: Մարզում 2017թ. կատարված ցանքսն ամբողջովին հնձվել է:
Նշվեց, որ մարզում գործող բոլոր առողջապահական կազմակերպությունների պետական պատվերի գլոբալ բյուջեն կազմել է 2.14 մլրդ դրամ, որից 1.09 մլրդ դրամ արտահիվանդանոցային և 1.05 մլրդ դրամ հիվանդանոցային ծառայությունների գծով: 2017 թվականին պետական պատվերի գլոբալ բյուջեի կատարողականը կազմել է 2.09 մլդ.դրամ (98.% ): Ֆինանսական փոխհատուցումը իրականացվել է 100%:
2017թ. առարկայական oլիմպիադաների հանրապետական փուլի մասնակից 200 աշակերտներից 33-ը գրավել են մրցանակային տեղեր։ 2017թ. «Գերազանցության մեդալի» հավակնորդ 39 աշակերտից 33-ը, նախորդ տարվա 31-ի դիմաց, արժանացել են Գերազանցության մեդալի: «Տարվա լավագույն տնօրեն» մրցույթի եզրափակիչ` հանրապետական փուլում հաղթող է ճանաչվել մարզի Եղեգի միջնակարգ դպրոցի տնօրենը: Դասագրքերի վարձավճարների հավաքագրման գործում Սյունիքի մարզն ապահովել է ամենաբարձր ցուցանիշը՝ 100%:
Նիստին ներկայացվեց նաև տեղեկատվություն մարզում 2018 թվականի համար նախատեսված միջոցառումների ծրագրերի, կատարման ժամկետների և ակնկալվող արդյունքների մասին:
ՀՀ Սյունիքի մարզի զարգացման և ներդրման հիմնադրամի տնօրեն Զ. Մեղրյանը տեղեկատվություն ներկայացրեց 2018 թվականին հիմնադրամի կողմից նախատեսված աշխատանքների վերաբերյալ: Նշվեց, որ հիմնադրամը ՀՀ Սյունիքի մարզպետարանի հետ համատեղ, մասնագիտացված կազմակերպության հետ համագործակցությամբ՝ իրականացնելու է մարզի տնտեսական զարգացմանն ուղղված ռազմավարություն, որը ներառելու է կոնկրետ բիզնես ծրագրեր, որոնց իրականացման և ներդրումներ ներգրավվելու նպատակով նախատեսում է հանդիպումներ կազմակերպել արտերկրյա գործարարների (Ռուսաստան, Ուկրաինա, Լիբանան և այլն) հետ: Նաև իրականացնում է մարզի գյուղացիական տնտեսություններին ազոտական պարարտանյութով ապահովելուն ուղղված աշխատանքները, որի արդյունքում այսօր մարզի գյուղացիներին և գյուղացիական տնտեսություններին մատակարարվում է շուկայականից ցածր գնով ազոտական պարարտանյութ: Հիմնադրամը մարզի մեղվապահների հետ սկսել է պիլոտային ծրագիր մեղրի արտադրության ոլորտում՝ աշխատանքները ընթացքի մեջ են, որի արդյունքները տեսանելի կլինեն սեպտեմբեր ամսին: Զինավոր Մեղրյանի փոխանցմամբ, մարզում տնտեսական զարգացմանն ուղղված ծրագրերի հետ զուգահեռ, հիմնադրամը շարունակելու է 2017 թվականին որդեգրած քաղաքականությունը. այն է` իրականացնել ծրագրեր սոցիալական, կրթական և առողջապահական ոլորտներում, մասնավորապես. մշտական օժանդակության ցուցաբերում սոցիալապես անապահով ընտանիքներին, շարունակվում է Էջանանցու անվան կրթաթոշակի հատկացումը, << Դպրոցական տաք սնունդ>> ծրագրով 34 խոհարարների ֆինանսական աջակցությունը, ուսման վճարների փոխհատուցումը` պայմանագրային հիմունքներով, շարունակվում է բնակչության բնակարանային պայմանների բարելավման աշխատանքները, Կապան քաղաքում տրանսպորտի սակագների փոխհատուցման նպատակով դոտացիայի տրամադրումը, ապրիլյան պատերազմում զոհված ազատամարտիկների ընտանիքների ամենամսյա ֆինանսական աջակցությունը և այլն։
Նիստին <<Գորիսի բժշկական կենտրոն>> ՓԲԸ-ի տնօրեն Ս. Աֆանդյանը տեղեկատվություն ներկայացրեց բուժհաստատությունում 2017 թվականին իրականացված ծրագրերի և բարեփոխումների վերաբերյալ: Նշվեց, որ բժշկական կենտրոնի աշխատակազմը համալրվել է լավագույն բժիշկներով, որի արդյունքում ավելացել է տարածաշրջանի բնակչության վստահությունը կենտրոնի նկատմամբ:
Ամփոփելով մարզխորհրդի նիստը՝ Վահե Հակոբյանը նշեց, որ Կապանում գործող պիցցայի արտադրամասը 2018 թվականին նախատեսում է ունենալ մոտ 70 աշխատատեղ՝ կախված արտադրության ծավալներից, իսկ Քաջարան համայնքի Լեռնաձոր բնակավայրում կսկսի աշխատել ևս մեկ գործարան՝ մոտ 500.000 ԱՄՆ դոլար ներդրումային արժողությամբ տրիկոտաժի ֆաբրիկան, որը ապահովելու է 100 աշխատատեղ, իսկ արտադրանքն արտահանվելու է Ուկրաինա: Անդրադառնալով զբոսաշրջությանը՝ մարզի ղեկավարը ընդգծեց, որ 2018 թվականի ընթացքում, ընդհանուր առմամբ, նախատեսվում է մարզում առանձնացնել և թիրախավորել շուրջ 30 զբոսաշրջային տարածք։ Արդեն ներկայացվել են մի շարք ներդրումային ծրագրեր, ինչպիսիք են, օրինակ` մարզում առաջին զիպլայնի նախագիծը, էկո գյուղերի ստեղծումը, աշխարհում լայն տարածում ունեցող «Bаd and breakfast» հյուրընկալման ֆորմատի զարգացումը և այլն: Վահե Հակոբյանը նաև տեղեկացրեց, որ մեծ բարեփոխումներ կլինեն գյուղատնտեսության բնագավառում: