Սյունիքի մարզպետի աշխատակազմ

 Այսօր Սյունիքի մարզպետարանում դպրոցականների առարկայական օլիմպիադաների մարզային փուլում մրցանակային տեղեր զբաղեցրած սյունեցի դպրոցականները ՀՀ Սյունիքի մարզպետ Վահե Հակոբյանի կողմից պարգևատրվել են առաջին, երկրորդ և երրորդ կարգի դիպլոմներով: Դպրոցականներին պարգևները հանձնել են ՀՀ Սյունիքի մարզպետի խորհրդական Միլենա Գասպարյանը և մարզպետարանի աշխատակազմի կրթության, մշակույթի ու սպորտի վարչության պետ Մերի Գանդալյանը: 2017-2018 ուսումնական տարվա դպրոցականների առարկայական oլիմպիադայի մարզային փուլին մասնակցել է 600 աշակերտ, որոնցից 162-ն արժանացել է դիպլոմների:
Միլենա Գասպարյանը մարզպետ Վահե Հակոբյանի անունից շնորհավորել է պարգևատրվածներին, շնորհակալություն հայտնել նրանց օլիմպիադաների ընթացքում ցուցաբերած ձեռքբերումների և մարզի անունը բարձր պահելու համար: Մ. Գասպարյանը նաև տեղեկացրեց, որ սյունեցի դպրոցականներն այս տարի փայլել են նաև դպրոցականների առարկայական օլիմպիադաների հանրապետական փուլում՝ գերազանցելով նախորդ տարվա արդյունքները: Այս տարի հանրապետական փուլում Երևանից հետո առաջատարը Սյունիքն է: Հանրապետական փուլին մարզից մասնացել է 107 աշակերտ, որից մրցանակակիր են դարձել 47-ը՝ նախորդ տարվա 33-ի փոխարեն:
Ավելացնենք, որ դպրոցականների առարկայական oլիմպիադայի հանրապետական փուլի մրցանակակիրները Սյունիքի մարզպետի աջակցությամբ քննաշրջանի ավարտից հետո կայցելեն Արցախի Հանրապետություն: