Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
ՍՅՈՒՆԻՔԻ ՄԱՐԶՊԵՏԻ ԱՇԽԱՏԱՆՔԱՅԻՆ ԱՅՑԸ ՄԵՂՐԻ ՀԱՄԱՅՆՔ
25.10.2018
Հոկտեմբերի 25-ին աշխատանքային այցով Մեղրի համայնքում էր Սյունիքի նորանշանակ մարզպետ Հունան Պողոսյանը:
Մինչ Մեղրիի մաքսակետ եւ համայնքապետարան նախատեսված այցերը, մարզպետը մասնակցեց Մեղրիի մանկապարտեզում կազմակերված աշնանային բացօթյա միջոցառմանը, շրջեց փոքրիկների պատրաստած գունեղ տաղավարներով, համտեսեց համայնքում պատրաստված գինի, լավաշ, անուշեղեն: Ի դեպ, մարզպետի այցն անակնկալ էր միջոցառման մասնակիցների համար:
Մեղրի համայնքի ղեկավար Մխիթար Զաքարյանի ուղեկցությամբ Սյունիքի մարզպետը շրջեց մաքսատան տարածքում, նաեւ` հայ-իրանական սահմանի երկայնքով, եղավ Մեղրիի ազատ տնտեսական գոտում: Մաքսատան աշխատակիցներին ցուցումներ տալով՝ մարզի ղեկավարը հորդորեց ավելորդ խոչընդոտներ չստեղծել օրվա հացը վաստակող, ընտանիք պահող քաղաքացիների համար, խստացնել անվտանգությունը, վերահսկողությունը եւ մաքուր, բարեկարգ պահել տարածքը:
Մարզպետը համայնքի ուժային կառույցների ներկայացուցիչների հետ անցկացրած փակ խորհրդակցությունից հետո զրույց ունեցավ Մեղրիի համայնքապետարանի աշխատակազմի հետ, առանձին-առանձին ծանոթացավ աշխատակիցների եւ նրանց կողմից համակարգվող ոլորտների հետ:
«Այստեղ աուրան դրական է, աշխատանքային մթնոլորտն՝ ակնհայտ, և հաճելի է փորձառու ավագների կողքին այսքան երիտասարդ կադրեր տեսնել: Իմ դռները բաց են բոլորի առաջ, հաճախակի եմ այցելելու ձեզ, ակնկալում եմ ամուր համագործակցություն հանուն մեկ նպատակի՝ առողջ եւ ամուր Սյունիքի ու մեր պետության», - իր խոսքն ավարտեց Հունան Պողոսյանը:
Մարզպետի՝ համայնք կատարած ճանաչողական այցի վերջին կանգառը Մեղրիի բժշկական կենտրոնն էր:
