Տեղեկատվական կենտրոն
Նորություններ
ԳՆԱՀԱՏԱՆՔ ԳԵՂԱՆԿԱՐՉԻՆ
29.11.2018
Նոյեմբերի 28-ին Սյունիքի մարզպետ Հունան Պողոսյանը հյուրընկալեց Կապանում եւ նրա սահմաններից դուրս հայտնի գեղանկարիչ Ռուբեն Կոստանդյանին (Ուբակ):
Լրացավ սիրված ու տաղանդաշատ արվեստագետի 60-ամյակը, եւ հոբելյանի առիթով ու մարզում մշակույթի զարգացման գործում ներդրած ավանդի, հայկական կերպարվեստը միջազգային ցուցահանդեսներում ըստ արժանվույն ներկայացնելու համար՝ մարզպետը շնորհակալագիր հանձնեց նրան:
Ռ.Կոստանդյանը շնորհակալություն հայտնեց գնահատանքի համար, այնուհետեւ ջերմ զրույց ծավալվեց մշակույթի, նրա դերի ու մարզում այդ ոլորտում առկա խնդիրների, զարգացման հնարավորությունների, բնագավառին առնչվող նախաձեռնությունների մասին: Մարզպետարանի աշխատակիցները եւս իրենց կարծիքն ու գնահատականը հնչեցրին Ուբակ գեղանկարչի եւ մտավորականի մասին:
Ռուբեն Կոստանդյանը ծնվելէ 1958թ. նոյեմբերի 23-ին Կապանում, 1992-ից ՀՀ նկարիչների միության անդամ է, ցուցահանդեսներ է ունեցել Կապանում եւ Երեւանում, ինչպես նաեւ Մոսկվայում, Արաբական Էմիրություններում, ֆրանսիայում:
Կապանի Սուրբ Մեսրոպ Մաշտոց եկեղեցում են գտնվում Մեսրոպ Մաշտոցին եւ Գրիգոր Նարեկացուն պատկերող նրա ստեղծագործությունները, ինչպես նաեւ Ռ.Կոստանդյանի ձեռքի աշխատանքն է եկեղեցու խորանի սրբապատկերը, տարածաշրջանի այլ եկեղեցիներում եւս խորանների պատկերներ է ստեղծել:
Գեղանկարչի աշխատանքները գտնվում են ԱՄՆ-ում, Կանադայում, Գերմանիայում, Ֆրանսիայում, Լեհաստանում, Լիտվայում, Բելգիայում, Ռուսաստանում եւ Հայաստանում՝ անհատական հավաքածուներում:
Միջազգային բարեգործական կազմակերպություններից մեկի պատվերով ստեղծել է «Քրիստոսի կյանքը» եռապատկերը: