Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
ՀԱՆԴԻՊՈՒՄ ԲԱՐԵՍԻՐԱԿԱՆ ՀԿ-Ի ՆԵՐԿԱՅԱՑՈՒՑԻՉՆԵՐԻ ՀԵՏ
01.03.2019
Փետրվարի 28-ին Սյունիքի մարզպետի տեղակալ Նարեկ Բաբայանը հյուրընկալեց «Հայկական Կարիտաս» բարեսիրական ՀԿ-ի ծրագրի ղեկավար Արմեն Մարտիրոսյանին եւ այլ աշխատակիցների: Աշխատանքային խումբը Սյունիք է այցելել իրենց առաջիկա ծրագրային նոր ռազմավարության մշակման մեջ մեր մարզը եւս ընդգրկելու եւ դրա համար նախնական ուսումնասիրություններ, կարիքների, ներուժի գնահատում, վերլուծություններ կատարելու համար:
Նրանց եւ մարզպետի տեղակալի, ինչպես նաեւ մարզպետարանի Կրթության, Սոցիալական ապահովության, Ընտանիքի, կանանց եւ երեխաների պաշտպանության բաժինների պետերի միջեւ ծավալուն զրույց տեղի ունեցավ, որի ընթացքում վերջիններս պատասխանեցին ՀԿ-ի ներկայացուցիչներին հետաքրքրող հարցերին: Դրանք վերաբերում էին մարզի ամենատարբեր ոլորտներին, որոնք օգնեցին լիարժեք պատկերացում կազմել Սյունիքի, նրա կյանքի տարբեր բնագավառներում առկա վիճակի, խնդիրների եւ զարգացման հնարավորությունների մասին: Տեղեկատվությունը կօգնի «Հայկական Կարիտասին» կողմնորոշվել Սյունիքին առնչվող հետագա ծրագրերի մշակման գործում:
«Հայկական Կարիտաս»-ը հիմնվել է 1995թ. Շիրակի մարզում եւ այս տարիների ընթացքում Շիրակից բացի գործունեություն է ծավալել նաեւ Լոռու, Արարատի, Գեղարքունիքի մարզերում, Երևանում: Կազմակերպության հիմնական ուղղություններն են` երեխաների սոցիալական պաշտպանություն, հաշմանդամություն ունեցող անձանց սոցիալական ներառում, տարեցների սոցիալական ներառում եւ խնամք, աղետների ռիսկի նվազեցում եւ արագ արձագանք արտակարգ իրավիճակներին, համայնքային զարգացում, միգրացիա եւ ինտեգրացիա:
