Տեղեկատվական կենտրոն
Նորություններ
ՈՒՇԱԴՐՈՒԹՅԱՆ ԿԵՆՏՐՈՆՈՒՄ ՍՆՆԴԱՄԹԵՐՔԻ ԱՆՎՏԱՆԳՈՒԹՅՈՒՆՆ Է
19.07.2019
ՀՀ Սննդամթերքի անվտանգության տեսչական մարմնի ղեկավար Գեորգի Ավետիսյանն այսօր աշխատանքային այցով գտնվում էր Սյունիքում։
Սյունիքի մարզպետարանում կայացած խորհրդակցության ժամանակ մարզպետ Հունան Պողոսյանն ու տեսչական մարմնի ղեկավարը վերահաստատեցին ակտիվ համագործակցելու և սննդամթերքի անվտանգության բնագավառում առավելագույն արդյունք ապահովելու իրենց պատրաստակամությունը:
ՍԱՏՄ ղեկավար Գեորգի Ավետիսյանը Հունան Պողոսյանի հետ նաև շրջայց կատարեց Կապանի շուկայում և հարակից տարածքում, ծանոթացավ թարմ մսի վաճառակետերում առկա խնդիրներին ու խանութների սանիտարահիգենիկ պայմաններին։
Թարմ մսի խանութները թե՛ անհրաժեշտ պայմաններով ու սարքավորումներով հագեցվածության (հոսող տաք ու սառը ջրի առկայություն, սառնարաններ և այլն), թե՛ սանիտարահիգիենիկ պայմանների պահպանման առումով գտնվում էին բարվոք վիճակում:
Կապանի կենտրոնական շուկան անմխիթար վիճակում էր։ Սյունիքի մարզպետ Հունան Պողոսյանը տեղեկացրեց, որ աշխատանքներ են տարվում սեփականատիրոջ հետ՝ շուկայի վերանորոգման համար ներդրումներ անելու և այն գործարկելու նպատակով։
Գեորգի Ավետիսյանը այցելել է նաև Կապանում գործող երկու թռչնաբուծական տնտեսություն՝ «Արգրո Բիո Պրոդուկտ» և «Սյունիքի թռչնաֆաբրիկա» ՍՊ ընկերություններ, ծանոթացել թռչնի պահման, մորթի կազմակերպման պայմաններին, վերամշակման, փաթեթավորման, պահպանման արտադրամասերին, կերի պահեստներում ու թռչնաբուծարանի տարածքում առկա սանիտարահիգիենիկ վիճակին, եղել համակցված կերի պատրաստման արտադրամասերում։