Սյունիքի մարզպետի աշխատակազմ

Սպանդանոցի կառուցումը և շահագործումն իրականացվում են զոոհիգիենիկ նորմերի և անասնաբուժասանիտարական ու բնապահպանական պահանջների պահպանմամբ:

Սպանդանոցները կառուցվում են բնակելի վայրերից, ֆերմաներից, արոտավայրերից, հասարակական վայրերից, բժշկական հաստատություններից առնվազն 300մ հեռավորության վրա:

Սպանդանոցը կարող է լինել առանձին շինության, շինությունների համալիրի տեսքով կամ կենդանական ծագման մթերք արտադրող, վերամշակող կազմակերպությունների կազմում:

Ըստ հերթափոխում իրականացվող մորթի քանակության կամ սպանդային միավորի` սպանդանոցները լինում են`

-խոշոր` հերթափոխում 300-ից ավելի սպանդային միավոր հզորությամբ.

-միջին` 30-300 սպանդային միավոր հզորությամբ.

-փոքր` մինչև 30 սպանդային միավոր հզորությամբ:

Սպանդանոցի տարածքը ստորաբաժանվում է հետևյալ 3 հիմնական գոտիների.

-կենդանիների նախասպանդային պահման բազա` սանիտարական սպանդանոցով, կարանտինային բաժնով և մեկուսարանով,

-տնտեսական` օժանդակ կառույցներով, վառելիքի, շինարարական նյութերի պահեստներով,

-արտադրական՝ հիմնական արտադրական մասնաշենքերով:

Փոխադրամիջոցների անիվների ախտահանման համար արտադրության տարածք մտնելիս և ելնելիս դարպասների մոտ լինում է ախտահանիչ լուծույթով լցված հատուկ առու (ախտահանող պատնեշներ):

Ճանապարհների, բարձման-բեռնաթափման հարթակների, ավտոմոբիլային և երկաթուղային հարթակների, սանիտարական կառույցահատվածի տարածքի, բացօթյա փարախների ասֆալտաբետոնային ծածկերը լինում են հարթ, անջրաթափանց, հեշտ ենթարկվում են լվացման և ախտահանման:

Կազմակերպության տարածքում կառույցների, մասնաշենքերի տեղակայումը բացառում է հետևյալ հանդիպակաց հոսքերը.

-հումքի և պատրաստի արտադրանքի,

-սննդամթերքի և կենդանիների, գոմաղբի, արտադրական թափոնների,

-առողջ և հիվանդ, ինչպես նաև կասկածելի հիվանդ կենդանիների:

Սպանդանոցի տարածքը լինում է ցանկապատված, ունենում է թեքություն դեպի հեղեղատար ջրահեռացման համակարգը` կեղտաջրերի, մթնոլորտային տեղումներից, ձնահալոցքից առաջացած ջրերի հեռացման համար: Կենդանիների պահման նախասպանդային բազայի, սանիտարական կառույցահատվածի, վառելիքային տնտեսության կեղտաջրերը չպետք է թափվեն կազմակերպության մյուս տարածքներ:

Տարածքը պահվում է մաքուր վիճակում: Տարվա տաք եղանակներին տարածքը ջրվում է, իսկ ձմռանը` մաքրվում ձյունից և սառույցից:

Աղբի հավաքման համար ասֆալտածածկ, բետոնածածկ կամ հեշտ մաքրման հնարավորություն ընձեռող այլ հարթակների վրա տեղադրվում են կափարիչով ամուր փակվող տարողություններ: Հարթակները արտադրական և պահեստային մասնաշենքերից գտնվում են 25 մետրից ոչ պակաս հեռավորության վրա:

Տարողություններից աղբի և թափոնների հեռացումը կատարվում է օրը մեկ անգամից ոչ պակաս: Աղբը հեռացնելուց հետո տարողությունները լվացվում և ախտահանվում են:

Սպանդանոցն ունի մեկուսացված, բետոնապատ հրապարակ՝ կենդանիների արտաթորանքի և մարսողական ուղիների պարունակության հավաքման` 30 օրվանից ոչ պակաս տևողությամբ պահելու և կենսաջերմային եղանակով վնասազերծելու համար:

Սպանդանոցը պետք է ունենա անասնաբուժասանիտարական փորձաքննության անցկացման համար նախատեսված աշխատատեղ և հագեցած լինի համապատասխան լաբորատոր սարքավորումներով:

Սպանդանոցը պետք է ունենա կենդանիների տեղափոխման և սպանդից ստածված մթերքի համար նախատեսված համապատասխան մեքենաներ :

Սպանդանոցը ունենում է սանիտարական պահպանման գոտի, համաձայն «Արդյունաբերական ձեռնարկությունների նախագծման սանիտարական նորմեր» ՍՆ 245-71-ի:

Սպանդանոցներում գյուղատնտեսական կենդանիների սպանդի կազմակերպման կարգը և ներկայացվող պահանջները սահմանված է ՀՀ կառավարության 2006թվականի N993-Ն որոշմամբ:

Ջրամատակարարման և ջրահեռացման համակարգերին, լուսավորմանը, ջեռուցմանը, օդափոխությանը, միկրոկլիմային և աղմուկին, արտադրական և օժանդակ սենքերին, կենդանիների նախասպանդային պահման բազային և տեխնոլոգիական գործընթացին ներկայացվող հիգիենիկ պահանջները սահմանված են ՀՀ առողջապահության նախարարի «Մսի և մսամթերքի արտադրության կազմակերպություններին ներկայացվող հիգիենիկ պահանջներ» N 2-III-4.1-07-2003 սանիտարական կանոնները և հիգիենիկ նորմերը հաստատելու մասին հրամանով:

Սպանդ իրականացնող տնտեսավարող սուբյեկտները իրենց գործունեությունը իրականացնում են Սննդամթերքի անվտանգության տեսչական մարմնի կողմից տրվող  սննդի շղթայի օպերատորների գործունեության եզրակացության հիման վրա: Տնտեսավարողը ստանում է անհատական նույնականացման համար և սկսում է իր գործունեությունը: