Տեղեկատվական կենտրոն
Նորություններ
ԵՄ ՊԱՏՎԻՐԱԿՈՒԹՅԱՆ ԵՎ ԵՄ ԵՐԿՐՆԵՐԻ ԴԻՎԱՆԱԳԻՏԱԿԱՆ ՆԵՐԿԱՅԱՑՈՒՑՉՈՒԹՅՈՒՆՆԵՐԻ ՂԵԿԱՎԱՐՆԵՐՆ ԱՅՑԵԼԵԼ ԵՆ ՍՅՈՒՆԻՔ
20.05.2021
ՀՀ-ում ԵՄ դեսպան Անդրեա Վիկտորինի և Հայաստանում հավատարմագրված ԵՄ անդամ պետությունների դեսպանների նախաձեռնությամբ ՀՀ իշխանությունները կազմակերպել էին փաստահավաք առաքելություն, որի շրջանակներում ԵՄ պատվիրակության և ԵՄ երկրների դիվանագիտական ներկայացուցչությունների ղեկավարները մայիսի 20-ին այցելել են Սյունիքի մարզ` Ադրբեջանի կողմից Հայաստանի ինքնիշխան տարածք ներթափանցման հետևանքով առաջացած իրավիճակին տեղում ծանոթանալու համար:
ՀՀ արտգործնախարարի տեղակալ Ավետ Ադոնցի և Սյունիքի մարզպետ Մելիքսեթ Պողոսյանի ուղեկցությամբ դեսպաններն այցելեցին Սև լճի շրջակա լեռնային տարածք՝ իրավիճակը տեղում տեսնելու, համապատասխան քարտեզներին և տարածքում առկա իրադրությանը ծանոթանալու նպատակով։ Լրատվամիջոցների հետ հարցուպատասխանի ընթացքում դեսպան Վիկտորինը շեշտադրել է տարածքային ամբողջականության և վեճերի խաղաղ կարգավորման կարևորությունը։