Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
ՍՅՈՒՆԻՔԻ ՄԱՐԶՊԵՏՆ ԱՅՑԵԼԵԼ Է ԳՈՐԻՍ ՀԱՄԱՅՆՔԻ ԲՈԼՈՐ ԳՅՈՒՂԵՐ
30.05.2023
Սյունիքի մարզպետ Ռոբերտ Ղուկասյանը մայիսի 23-29-ը այցեր ու հանդիպումներ է ունեցել Գորիս համայնքի բոլոր բնակավայրերում։
Գորիս համայնքի ղեկավար Առուշ Առուշանյանի ուղեկցությամբ մայիսի 23-ին նա եղել է Վերիշեն ու Ակներ գյուղերում։ Մարզպետը հանդիպել է բնակիչների հետ, լսել նրանց բարձրաձայնած խնդիրները, այցելել նաև երկու բնակավայրերի դպրոցներ։
Ակների միջնակարգ դպրոցում Ռոբերտ Ղուկասյանը աշակերտների համար նաև բաց դաս է անցկացրել «Նախնական զինվորական պատրաստություն» առարկայից։
Մայիսի 24-ին Գորիս համայնքում աշխատանքային այցերի շրջանակում նա եղել է Քարահունջ և Հարթաշեն բնակավայրերում։
Երկու գյուղերում էլ մարզպետը հանդիպել է բնակիչների հետ, խոսել նրանց հուզող խնդիրների մասին ու լուծումների առաջարկներ լսել։
Ռոբերտ Ղուկասյանն այցելել է նաև Քարահունջի և Հարթաշենի միջնակարգ դպրոցներ, քննարկումներ ունեցել ավարտական դասարանների աշակերտների և մանկավարժների հետ։
Քարահունջում մարզի ղեկավարը նաև 17-րդ դարի Սուրբ Հռիփսիմե եկեղեցի ու բուժկետ է այցելել։
Սյունիքի մարզպետը մայիսի 25-ին այցելել է Գորիս համայնքի Խնձորեսկ ու Ներքին Խնձորեսկ բնակավայրեր։
Նա հանդիպումներ է ունեցել բնակիչների հետ, եղել նաև գյուղերի միջնակարգ դպրոցներում․ ի դեպ, Ներքին Խնձորեսկի՝ այս տարվա միակ շրջանավարտին մարզպետը համակարգիչ է նվիրել։
Ռոբերտ Ղուկասյանը Ներքին Խնձորեսկում այցելել է «Տարոն» ՀԿ-ի սոցիալական ձեռնարկության հացաթխման արտադրամաս ևս, նաև հիդրոպոնիկ եղանակով աճեցման ծրագրի արդյունքներ դիտարկել։
Եվ մայիսի 29-ին Ռոբերտ Ղուկասյանը եզրափակել է այցերը Գորիս համայնքի բնակավայրեր։
Գորիս համայնքի ղեկավար Առուշ Առուշանյանի ուղեկցությամբ մարզպետը եղել է Շուռնուխ, Բարձրավան և Որոտան գյուղերում․ նա հանդիպումներ է ունեցել բնակիչների հետ, լսել նրանց հուզող խնդիրների մասին։
Բարձրավանի ճանապարհին Ռոբերտ Ղուկասյանը նաև Բղենո Նորավանք է այցելել։
