Սյունիքի մարզպետի աշխատակազմ

Այն ստորագրել են մարզպետ Ռոբերտ Ղուկասյանը և «Սանտե Արմենի»-ի համահիմնադիր Նադյա Գործունյանը։

Սրանով Կապանում մեկնարկում է ընտանեկան բժշկական շարժական թիմերի գործունեությունն այն գյուղերում, որտեղ առողջապահական ծառայությունները սահմանափակ են։

Մարզպետը շնորհակալություն է հայտնել ծրագրի համար ու նշել դրա կարևորությունը՝ հեռավոր գյուղերում բնակչության առողջության պահպանման համար։

Հիշեցնենք, որ արդեն 2 տարի է կազմակերպությունն այս շարժական ամբուլատոր ծառայությունները մատուցում է Գորիսի գյուղերում։

Սյունիքի և Ֆրանսիայի Օվերնյ-Ռոն-Ալպի միջև համագործակցության շրջանակում մարզային իշխանությունը գարնանը քննարկել էր ծրագիրը նաև Կապան բերելու հնարավորությունը, որը և կյանքի կոչվեց։

Համապատասխան սարքավորումներով հագեցած մեքենան արդեն իսկ Կապանում է, ու ընտանեկան բժիշկը որոշակի պարբերականությամբ դրանով կայցելի մարզկենտրոնի գյուղեր՝ տեղում սպասարկելով բնակչությանը։ Ծառայությունը ենթադրում է ընտանեկան բժշկի խորհրդատվություն, էլեկտրասրտագրություն, այլ հետազոտություններ, արյան մի քանի տեսակի անալիզ, որոշ դեպքերում դրսի բժիկների հետ կոնսուլտացիաներ և այլն։

Հուշագրի շրջանակներում «Սանտեն» կիրականացնի այլ գործողություններ ևս՝ բուժաշխատողների վերապատրաստումներ, վերականգնողական կենտրոնների հիմնում, հոգեբանների աջակցություն և այլն։

Այս օրերին էլ Կապանի ԲԿ-ում վերապատրաստման դասընթացներ են անցկացվում, կազմակերպությունը բժշկական կենտրոնին նաև 2 դեֆիբրիլյատոր (կիրառվում է սրտի էլեկտրական վիճակը վերականգնելու համար) սարք է նվիրել։

Սյունիքի մարզում Santé Arménie-ի կողմից ծրագրերն իրականացվում են Ֆրանիսայի Օվերնյ-Ռոն-Ալպ շրջանի ու այլ կազմակերպությունների աջակցությամբ։