Սյունիքի մարզպետի աշխատակազմ

Խորագրին համահունչ էլ ընտրվել էր միջոցառման անցկացման վայրը՝ դավիթբեկցի դամրչի (դարբին) Միրզայի օջախը, որը շարունակում են շենացնել վարպետի թոռներն ու ծոռները՝ պահպանելով պապերից ժառանգած ավանդույթներն ու նիստուկացը:

Դարբին Միրզայի թոռ Վրեժ Մելքումյանի տան բակում էլ հավաքվել էին միջոցառման մասնակիցները: Օրվա ընթացքում ներկայացվեցին Նոր տարվան և Սուրբ Ծննդին վերաբերող ազգային ծեսեր, թոնրատան հետ կապված ավանդույթներ ու լավաշի թխման արարողություն, կազմակերպվեցին ծիսախաղեր:

Հյուրընկալ տան բակը ձևավորվել էր ազգային կենցաղին բնորոշ դետալներով՝ երկրագործական գործիքներով, մեր պապերի արհեստն ու նիստուկացը ներկայացնող կոլորիտային իրերով:

Ներկայացվեցին նաև երգեր, պարեր, ասմունք և մեր բնակավայրերին բնորոշ արհեստների ու նիստուկացի մասին պատմություններ:

Միջոցառման ընթացքում մասնակիցներին մատուցվեց նաև թոնրատանը թխված թարմ լավաշ, ներկայացվեց մատաղի խորհուրդն, ու կատարվեց օրհնված մատաղի բաշխման արարողություն: