Սյունիքի մարզպետի աշխատակազմ

Այս անգամ մարզը ներկայացնում էին Տաթև համայնքում գործող «Ժասմենա» նորաձևության սրահն ու նորաստեղծ «Շինուհայր» երգի-պարի համույթը (ղեկավար՝ Արտյոմ Սյունեցի), Գորիս համայնքի Խնձորեսկ բնակավայրում գործող «Արի Խնձորեսկ» տարածքային զարգացման ՀԿ-ն (նախագահ` Նարեկ Ադամյան) և Շուռնուխի միջնակարգ դպրոցի ուսուցչուհի, ձեռքի աշխատանքների վարպետ Լուսինե Սարգսյանը:

Սյունիքի տաղավարներում ցուցադրվեցին հայկական ազգային տարազներ, տարբեր նյութերից պատրաստված ձեռագործ հուշանվերներ ու գեղարվեստական ձևավորումներով աշխատանքներ, հայկական արծաթագործության վարպետությանը համահունչ զարդեղեն:

Մատուցվեց «Սյունիք» նախշազարդումով պատրաստված գաթա, փառատոնի այցելուներին ներկայացվեցին տաղավարներն ու անդրադարձ եղավ ցուցադրված աշխատանքների ստեղծման պատմությանը: Մարզի տաղավարներում կազմակերպվեց նաև վարպետության դաս՝ մետաքսե շարֆերի վրա արվող ազգային զարդանախշերի տեխնիկայի ուսուցում:

Փառատոնի ընթացքում ելույթ էին ունենում մարզերից ժամանած երգի ու պարի համույթները։ Սյունիքից հանդես եկան Շինուհայրի պարուհիները․ նրանք պարային կատարումներից բացի ցուցադրեցին Վան-Վասպուրականի տարազը: Իսկ Սյունիքի համերգային ծրագրի ընթացքում բեմի մեծ էկրանին ցուցադրվեցին 2024թ. Սյունիքի մարզպետի աշխատակազմի կողմից կազմակերպված հիշարժան միշակութային միջացառումներից դրվագներ:

Փառատոնը կազմակերպվել էր ՀՀ ԷՆ զբոսաշրջության պետական կոմիտեի, ՀՀ տարածքային զարգացման և ենթակառուցվածքների նախարարության, Հայաստանի մարզպետների աշխատակազմերի աջակցությամբ։