Սյունիքի մարզպետի աշխատակազմ

Մինչ մարզային փուլի անցկացումը Սյունիքի տարբեր դպրոցների թիմեր մասնակցել էին դպրոցական ու համայնքային փուլերին:

Մարզային փուլին մասնակցեցին համայնքային փուլի հաղթողները՝ Կապանի թիվ 3 միջնակարգ, Ագարակի միջնակարգ, Խնձորեսկի միջնակարգ և Սիսիանի ավագ դպրոցների թիմերը:

Ռազմամարզական խաղերի հիմնական նպատակը հայրենիքի պաշտպանությանը պատրաստ և ազգային բանակում ծառայելու համար ֆիզիկապես կոփված երիտասարդներ պատրաստելն ու նրանց մեջ առողջ ապրելակերպ արմատավորելն է:

Խաղերը նախատեսված են 9-12-րդ դասարանների աշակերտների համար։ Յուրաքանչյուր թիմում ընդգրկված է 9 պատանի։ Նրանք իրենց ուժերը, պատրաստականությունն ու սպորտային հմտությունները չափեցին հետևյալ մրցաձևերի պայքարում՝ նռնակի նետում, 8կգ-անոց ուսապարկով փոխանցումավազք, ձգումներ պտտաձողից, կրոսավազք, հրաձգություն (օդամղիչ հրացանով), ինքնաձիգի քանդում-հավաքում սահմանված ժամանակահատվածում։

Ռազմամարզական խաղերի մարզային փուլի հաղթող ճանաչվեց Կապանի թիվ 3 միջնակարգ դպրոցի թիմը, որն առաջիկայում նախատեսվող եզրափակիչ-հանրապետական փուլի մրցումներում կներկայացնի Սյունիքի մարզը։

Մարզային փուլի 1-3-րդ տեղերը գրաված դպրոցները ստացան ՀՀ ԿԳՄՍ նախարարության համապատասխան կարգի հավաստագիր։

Ընդգծենք, որ խաղերն ընթացան կազմակերպված` հմուտ մրցավարների, բոլոր մասնակից դպրոցների զինղեկների, ինչպես նաև ՀՀ Սյունիքի մարզպետի աշխատակազմի կրթության, մշակույթի և սպորտի վարչության անմիջական մասնակցությամբ ու վերահսկողությամբ։