Սյունիքի մարզպետի աշխատակազմ

Հայաստանի Հանրապետությունում տեղական ինքնակառավարման համակարգն այսօր դառնում է 28 տարեկան:

Նոյեմբերի 10-ին նշվող մասնագիտական ​​տոնի առիթով շնորհավորում եմ ՏԻՄ ոլորտի ներկայացուցիչներին՝ համայնքների ղեկավարներին, ավագանիների անդամներին, համայնքային ծառայողներին և համայնքային ենթակայության կազմակերպությունների աշխատակիցներին։

Շնորհավորում եմ նաև պետական կառույցների այն աշխատակիցներին, որոնք համագործակցում են ՏԻՄ բնագավառի

հետ ու համակարգում նրանց աշխատանքը։

Տեղական ինքնակառավարումը ժողովրդավարական համակարգի կարևորագույն հիմնասյուներից է, և ՏԻՄ օրը հաստատապես մտել է մեր երկրի մասնագիտական ​​տոների օրացույց: Այսօր տեսանելի է տեղական ինքնակառավարման հսկայական դերը Հայաստանում պետականության կառուցման, տեղական ինստիտուտների ձևավորման և կատարելագործման ընթացքում։

Կառավարության և հասարակության միջև փոխգործակցության ամրապնդումը համայնքների զարգացման և առաջընթացի երաշխիքներից են։ Իսկ նրանց կապող օղակը, ինչպես նաև տեղական մակարդակում քաղաքացիների՝ որոշումներ կայացնելու գործընթացներում ներգրավվածությունն ապահովողն ու երաշխավորը ՏԻՄ-ն է։

Կենսական է տեղական ինքնակառավարման մարմինների դերը համայնքների զարգացման գործում, և նրանց ղեկավարների, ավագանիների, համայնքային ծառայողների կոմպետենտությունից, արհեստավարժությունից, պատասխանատվության զգացումից, լիակատար նվիրումով աշխատելու պատրաստակամությունից է կախված իրենց համայնքի ու նրա բնակիչների կյանքի որակի բարելավումը։

Սյունիքի մարզի համընդհանուր զարգացումն, իհարկե, ամփոփում է մեր բոլոր համայնքների բոլոր բնակավայրերի զարգացումը։ Միասին մենք ընդհանուր նպատակ ունենք՝ մեր հայրենակիցների կյանքն ավելի հարմարավետ ու բարեկեցիկ դարձնել։ Ուստի, վերահաստատում եմ մարզային իշխանության հանձնառությունը՝ աջակցելու զարգացման շարունակական նախաձեռնություններին։

Եվ քանի որ ձեր աշխատանքը, նախևառաջ, ծառայություն է և մեծ պատասխանատվություն, շնորհակալություն եմ հայտնում մարզի բոլոր ՏԻՄ ներկայացուցիչներին՝ կատարած աշխատանքի և նվիրվածության համար, մարզի սոցիալ-տնտեսական զարգացման գործում ավանդի, համաքաղաքացիների և հայրենի հողի հանդեպ անկեղծ մտահոգության համար։

Բոլորիդ մաղթում եմ քաջառողջություն, աշխատելու խաղաղ միջավայր, նոր գաղափարներ և դրանց իրագործումն ի շահ Սյունիքի։