Սյունիքի մարզպետի աշխատակազմ

«Սյունիքի վերականգնման, դիմակայունության և զարգացման» ծրագրի («R2D Սյունիք») «Բաղադրիչ 1»-ն ուղղված է մարզում բիզնես միջավայրի բարելավմանը և մասնավոր հատվածի մրցունակության բարձրացմանը. այն կիրականացնի «Ջինիշյան» հիշատակի հիմնադրամը, իսկ «R2D Սյունիքն» ընթանում է Եվրոպական Միության և Ավստրիական զարգացման գործակալության համաֆինանսավորմամբ՝ «Դիմակայուն Սյունիք թիմ Եվրոպա նախաձեռնության» շնորհիվ։

Այս բաղադրիչը կտևի մինչև 2027 թվականը և կաջակցի Սյունիքի մարզում միկրո, փոքր և միջին ձեռնարկություններին (ՄՓՄՁ)։

Ծրագիրը նախատեսում է նախ կրթական, խորհրդատվական, կարողությունների զարգացման գործողություններ և ապա բիզնեսի զարգացման համար մինչև 10 000 եվրո դրամաշնորհներ՝ ընտրված նոր ստեղծվող բիզնեսների համար։

Ռոբերտ Ղուկասյանն իր գոհունակությունն է հայտնել մեկնարկող ծրագրի վերաբերյալ ու նշել, որ մարզպետի աշխատակազմը պատրաստ է փոխգործակցության՝ այն արդյունավետ իրագործելու համար։

3, 5 մլն եվրո ընդհանուր արժեքով ծրագրի արդյունքում ակնկալվում է, որ մարզում ՄՓՄՁ ոլորտում ոչ ֆինանսական աջակցություն կստանա 250 շահառու, ֆինանսական՝ 125 ՄՓՄՁ, կարողությունների զարգացում կապահովվի 80-100 ՄՓՄՁ-ի համար, կստեղծվի 150 կայուն աշխատատեղ։

Առաջնահերթություն կտրվի կանանց, երիտասարդներին, բռնի տեղահանվածներին և հաշմանդամություն ունեցող անձանց: Ծրագիրը կենտրոնանալու է ագրովերամշակման, արդյունաբերության և զբոսաշրջության ոլորտների վրա։