Սյունիքի մարզպետի աշխատակազմ

Սյունիքի մարզպետի տեղակալ Հայկ Հարությունյանը շնորհավորեց ներկաներին Թանգարանների միջազգային օրվա կապակցությամբ, կարևորեց այն աշխատանքը, որ անում է Կապանի երկրագիտականը, այն առաջընթացը, նորարար մոտեցումներն ու զարգացումը, որ նկատելի են այստեղ վերջին տարիներին։

Հ․ Հարությունյանը տեղեկացրեց նաև, որ մասնագիտական օրվա կապակցությամբ թանգարանի տնօրեն Ալյոշա Հայրապետյանն արժանացել է ԿԳՄՍ նախարարի պատվոգրի։

Սյունիքի մարզպետը, շրջայց կատարելով թանգարանում, զրուցեց վարպետաց դասեր անցկացողների, արհեստական պեղավայրում աշխատող աշակերտների, թանգարանում կամավորություն անող երիտասարդների հետ։

Թանգարանը ներկայացել էր «Հնագիտություն. հնից` նոր» խորագիրը կրող ցուցադրությամբ, որտեղ ներկայացված են մոտ 70 հնագիտական առարկաներ․ դրանք առաջին անգամ վերականգնվել, ամրակայվել և նոր կյանք են ստացել հենց տեղում` թանգարանում բացված լաբորատորիայում։

Վերականգնման և ամրակայման լաբորատորիայի պաշտոնական բացումը ևս տեղի ունեցավ մայիսի 17-ին. այն հիմնվել է Սյունիքի մարզպետ Ռոբերտ Ղուկասյանի աջակցությամբ, Զանգեզուրի ՊՄԿ-ի ֆինանսավորմամբ։

Կապանի երկրագիտականում նաև վարպետաց դասեր էին կազմակերպվել այցելուների համար`«Դաշույնի պատրաստում», «Արի պեղենք միասին», «Խեցեգործություն», «Թանգարանն իմ աչքերով», «Դեկորատիվ կիրառական արվեստ. թանգարանային առարկաների կրկնօրինակներ», «Կարպետագործություն», «Ժայռապատկերներ», «Մագաղաթյա թղթերի պատրաստում»:

Օրն ամփոփվեց կիթառի երեկոյով` խարույկի շուրջ։