Սյունիքի մարզպետի աշխատակազմ

Նոր հիմնվող գործընկերության շրջանակում ԶՊՄԿ-ն ֆինանսական ներդրում է կատարում՝ աջակցելով «Դասավանդի՛ր, Հայաստանի» կրթական ծրագրերի իրականացմանը Սյունիքի մարզում՝ 2025-2026 ուսումնական տարվա ընթացքում։

Կրթական հիմնադրամի որակավորված հինգ ուսուցիչ-առաջնորդները կաշխատեն Սյունիքի բնակավայրերում՝ ուղղակի ազդեցություն ունենալով շուրջ 2000 աշակերտի վրա և կրթության միջոցով նպաստելով կայուն, երկարաժամկետ փոփոխություններին։

Այս փոխգործակցությունը հնարավոր է դարձել Սյունիքի մարզպետի աշխատակազմի աջակցության և ԶՊՄԿ-ի՝ ֆինանսական օժանդակություն տրամադրելու պատրաստակամության շնորհիվ։

Կարևորում եմ, որ ԶՊՄԿ-ն այս փոփոխություններ բերող ծրագրի աջակիցն է, քանի որ մեր երեխաների ուսման մեջ այսօր կատարվող ներդրումը լավ մասնագետներ ունենալու և Սյունիքի կայուն զարգացման երաշխիքն է», - ասաց Սյունիքի մարզպետ Ռոբերտ Ղուկասյանը։

«Զանգեզուրի պղնձամոլիբդենային կոմբինատի սոցիալական զարգացման ծրագրերում ավանդաբար մեծ դեր ունեն կրթական ծրագրերը», - ասաց «ԶՊՄԿ» բարեգործական հիմնադրամի տնօրեն Արմեն Ստեփանյանը։ «Մեզ համար հատկապես առաջնային են ներդրումները մեր տարածաշրջանում՝ Կապանում, Քաջարանում և ընդհանուր առմամբ Սյունիքի մարզում։ Այդ առումով Սյունիքում «Դասավանդի՛ր, Հայաստանի» ծրագրի գործընկեր դառնալը մեզ համար և՛, պատիվ է և՛ ոգևորության աղբյուր։ «Դասավանդի՛ր, Հայաստանը» նոր մշակույթ է բերում դպրոցներ, և ուրախ ենք, որ Սյունիքի դպրոցներում աշակերտները կդառնան այս բացառիկ ծրագրի մաս»։

«Մենք խորապես երախտապարտ ենք Սյունիքի մարզպետի աշխատակազմին՝ աջակցության և ԶՊՄԿ-ին՝ կրթությանը և սոցիալական զարգացմանը նվիրվածության համար», - ասաց «Դասավանդի՛ր, Հայաստանի» հիմնադիր և գործադիր տնօրեն Լարիսա Հովհաննիսյանը։ «Նրանց աջակցությունը ցույց է տալիս կրթության վերափոխող ուժի նկատմամբ մեր ընդհանուր հավատը։ Միասին մենք կարևոր քայլեր ենք ձեռնարկում Հայաստանի համար ավելի լուսավոր և արդար ապագա կառուցելու ուղղությամբ»։