Սյունիքի մարզպետի աշխատակազմ

Սյունիքի մարզպետի աշխատակազմի ենթակայության Կապանի երկրագիտական թանգարանն ու ԵՊՀ աշխարհագրության և երկրաբանության ֆակուլտետն այսօր մտադրությունների հուշագիր կնքեցին։

Մարզպետ Ռոբերտ Ղուկասյանի անունից հուշագրի ստորագրումն ու այս նոր նախաձեռնությունը շնորհավորեց և կարևորեց Սյունիքի մարզպետի աշխատակազմի գլխավոր քարտուղար էդգար Մարտիրոսյանը։

Նշելով, որ հայրենիքը ճանաչելու լավագույն վայրերից մեկը թանգարանն է՝ նա, մասնավորապես, ասաց․ «Բուհում և թանգարանում է, որ ձևավորվում է գիտությունը, ավելի շատ կիրառական գիտական աշխատանք է կատարվում, ուստի, այն գաղափարները, որ դրվում են նման համագործակցության հիմքում, այդ աշխատանքի ինստիտուցիոնալիզացիայի մի քայլ են։ Վստահ եմ, որ երկու կողմի համար էլ այս համագործակցությունը դրական արդյունք է ունենալու»։

Հուշագիրը ստորագրեցին Կապանի երկրագիտական թանգարանի տնօրեն Ալյոշա Հայրապետյանն ու ԵՊՀ աշխարհագրության և երկրաբանության ֆակուլտետի դեկան Սարգիս Քելյանը։

Այս հուշագրի շրջանակներում նախատեսվում է համատեղ գիտական, հետազոտական, նախագծային աշխատանքների իրականացում թանգարանային, մշակութային, կրթական, զբոսաշրջային ոլորտներում, կողմերի աշխատակիցների վերապատրաստում, ուսանողների արտադրական ու նախադիպլոմային պրակտիկայի անցկացում թանգարանում և մի շարք այլ գործողություններ։