Սյունիքի մարզպետի աշխատակազմ

Սյունիքի մարզպետի աշխատակազմում քննարկվել են մարզում մարդու իրավունքների պաշտպանությանն ու համակարգային խնդիրների լուծմանն ուղղված հարցեր

Սյունիքի մարզպետ Ռոբերտ Ղուկասյանն այսօր աշխատանքային հանդիպում է ունեցել ՀՀ մարդու իրավունքների պաշտպան Անահիտ Մանասյանի հետ։

Հանդիպման ընթացքում ընդգծվել է մարզպետի աշխատակազմի և պետական այլ կառույցների միջև առկա արդյունավետ փոխգործակցությունը, որը միտված է Սյունիքում քաղաքացիների իրավունքների պաշտպանությանը, ինչպես նաև առկա մարտահրավերների ու խնդիրների արագ արձագանքմանը։

Քննարկվել է նաև խնդիրների լուծման ընթացքը․ արձանագրվել է, որ ՀՀ ՄԻՊ-ի նախորդ այցելությունների ժամանակ բարձրացված համընդհանուր ու համակարգային հարցերի զգալի մասը ՀՀ կառավարության և մարզային իշխանությունների համատեղ ջանքերով լուծվել կամ գտնվում են լուծման փուլում։

Անդրադարձ է կատարվել մարզում իրականացվող ճանապարհաշինարարական ծրագրերին, բժշկական ծառայությունների հասանելիությանն ու որակի բարձրացմանը, ինչպես նաև սոցիալ-տնտեսական այլ առաջնահերթությունների։

«Սյունիքի մարզպետի աշխատակազմը բարձր է գնահատում բաց, կառուցողական և արդյունավետ համագործակցությունը։ Մեր առաջնահերթությունն է ապահովել մարզի բնակիչների իրավունքների պաշտպանությունը և հետևողականորեն լուծում տալ բոլոր բարձրացված հարցերին», - նշել է Ռոբերտ Ղուկասյանը։

Անահիտ Մանասյանն ասել է, - «Սյունիքի մարզպետի աշխատակազմի հետ ձևավորվել է պետական կառավարման համակարգում ամենաարդյունավետ համագործակցություններից մեկը։ Նույնիսկ բարդ հարցերում մենք կարողանում ենք համատեղ ջանքերով հասնել դրական արդյունքների»։

Կողմերը վերահաստատել են իրենց հանձնառությունը՝ շարունակելու ակտիվ աշխատանքը՝ հանուն Սյունիքի մարզի համաչափ զարգացման և բնակիչների բարեկեցության։