Տեղեկատվական կենտրոն
Նորություններ
ՄԻՋՈՑԱՌՈՒՄ ԿՐԹԱՀԱՄԱԼԻՐՈՒՄ՝ ՆՎԻՐՎԱԾ ՀԱՇՄԱՆԴԱՄՆԵՐԻ ՕՐՎԱՆ
03.12.2018
Այսօր Սյունիքի մարզպետ Հունան Պողոսյանը Կապանի թիվ 3 հատուկ կրթահամալիրում մասնակցեց կրթօջախի մանկավարժների եւ սաների ուժերով կազմակերպված՝ Հաշմանդամների օրվան (դեկտեմբերի 3) նվիրված միջոցառմանը:
Մարզպետը կրթահամալիրի համար նաեւ բերել էր մարզագույք, որն առավել արդյունավետ վերականգնողական թերապիա իրականացնելու հնարավորություն կտա (վազող ստիմուլյատոր, մերսող գնդակներ, փափուկ գորգ):
Բացելով միջոցառումը՝ կրթօջախի տնօրեն Մարինե Ղազարյանը ներկայացրեց կրթահամալիրն ու նրա գործառույթները, դպրոցի առօրյան ցուցադրվեց նաեւ տեսանյութի միջոցով:
Այստեղ սովորում են տարբեր առողջական եւ հոգեկան խնդիրներ ունեցող դպրոցահասակ երեխաներ, եւ միջին մասնագիտական ուսուցում են ստանում պատանիներ, ներկայումս 76 սովորող ունեն:
Այս տարվա ձեռքբերումներից Մ.Ղազարյանը առանձնացրեց կրթահամալիրի միջավայրի հարմարեցումը՝ կառուցված թեքահարթակների միջոցով: Տնօրենը նաեւ մանկավարժների եւ ծնողների մտահոգությունը ներկայացրեց մարզպետին՝ կրթօջախը միջպետական մայրուղուն հարակից տարածքում է, եւ սովորողներն անվտանգ երթեւեկելու խնդիր ունեն, ուստի ցանկալի կլիներ այստեղ վերգետնյա անցուղի կառուցել:
Միջոցառմանը երաժշտական տարբեր կատարումներով հանդես եկան կրթահամալիրի սաները:
Վերջում աշակերտներն իրենց ձեռքով պատրաստած նվեր հանձնեցին մարզպետին: