Սյունիքի մարզպետի աշխատակազմ

Հանդիպմանը ներկա էին մարզպետի աշխատակազմի, համայնքապետարանների, ուժային կառույցների, պետական մարմինների մարզային ստորաբաժանումների, առողջապահական հիմնարկների ներկայացուցիչներ։

Մարզպետի տեղակալն անդրադարձավ նախորդ տարվա շաբաթօրյակի ընթացքում ծագած խնդիրներին, որոնք ցանկալի է բացառել այս տարի՝ աշխատանքներն ավելի արդյունավետ դարձնելու համար։

Խորհրդակցության ընթացքում քննարկվեցին միջոցառման կազմակերպական հարցերը, ներգրավվող ուժերն ու տեխնիկական միջոցները, ինչպես նաև տարածքների բաշխման և պատասխանատուների նշանակման հետ կապված խնդիրները։

Առանձնահատուկ ուշադրություն դարձվեց աղբահանության կազմակերպմանը, անհրաժեշտ տեխնիկայի և գույքի ապահովմանը, ինչպես նաև անվտանգության կանոնների պահպանմանը։

Արձանագրվեց, որ բնության հատուկ պահպանվող տարածքներում աշխատանքները պետք է իրականացվեն հավելյալ աշխատուժի օժանդակությամբ և մասնագետների ներկայությամբ։

Այս տարի հատուկ աշխատանքներ են տարվելու նաև զբոսաշրջային նշանակություն ունեցող տարածքների մաքրության համատեքստում, որոնք աշխարհում ներկայանալի դառնալու գրավականներից մեկն են։

Համամարզային այս շաբաթօրյակում ակնկալվում է բնակչության ակտիվ մասնակցությունը։

«Վերջին հեղեղումների պատճառով համայնքների կոմունալ ծառայության աշխատակիցները շատ անելիքներ ունեն, նախընտրելի է, որ բնակիչներն ու փոքր տնտեսվարողներն իրենց ուժերով մաքրեն բակերն ու մերձակա տարածքները», - նշեց Հայկ Հարությունյանն ու ավելացրեց, որ շաբաթօրյակը զուտ մաքրության միջոցառում չէ․ այն գիտակցում և մշակույթ է, որը բնակչության մեջ սերմանում է հոգատարություն ու պատասխանատվություն շրջակա միջավայրի հանդեպ։