Սյունիքի մարզպետի աշխատակազմ

Այսօր Սյունիքի մարզում իրականացվեց մարզային շաբաթօրյակ, որն ընթացավ նախապես մշակված գործողությունների պլանի համաձայն։

Շաբաթօրյակին միացել էին մարզի 7 համայնքապետարաններից 6-ը, տարբեր պետական ու համայնքային կառույցներ, ուժային ու գերատեսչական մարմինների մարզային կառույցներ, կրթօջախներ, առողջապահական հաստատություններ և այլն։

Համայնքային ու ոլորտային պատասխանատուների ամփոփ տվյալներով՝ շաբաթօրյակն աչքի է ընկել ակտիվությամբ.

աշխատանքներին մասնակցել է մոտ 6800 քաղաքացի,

գործարկվել է 172 միավոր մեքենա ու մեխանիզմ,

կիրառվել է 5300 աշխատանքային գործիք։

Հատուկ ուշադրության կենտրոնում են եղել մարզի բնական և պատմական հուշարձաններն ու զբոսաշրջային այցելավայրերը։

Մասնավորապես, մաքրման լայնածավալ աշխատանքներ են իրականացվել հետևյալ տարածքներում.

«Սյունիքի զանգեր» և «Սյունիքի դարպասներ»,

Շաքիի ջրվեժի հարակից տարածք,

Որոտնավանք և «Սատանի կամուրջ»,

Խնձորեսկ և Հարսնաձորի դիտակետ։

Մայրուղիների մաքրությունն ապահովելու նպատակով ճանապարհահատվածները նախապես սահմանազատվել էին ըստ համայնքների՝ հստակ պատասխանատուներով։

Համայնքների ղեկավարների անմիջական վերահսկողությամբ իրականացվել են նաև ճամփեզրերի և գետերի հուների մաքրում՝ կուտակված պլաստիկ տարաներից և այլ կենցաղային թափոններից։

Սյունիքի մարզպետի աշխատակազմը շնորհակալություն է հայտնում շաբաթօրյակին մասնակցած յուրաքանչյուր սրտացավ քաղաքացու, տարբեր կառույցների ու հիմնարկների աշխատակիցներին, կրթական հաստատություններին և ակտիվ կազմակերպություններին՝ կատարած աշխատանքի, միասնականության և հայրենի բնության հանդեպ ունեցած հոգատարության համար։