Սյունիքի մարզպետի աշխատակազմ

Ծրագրի հիմնական նպատակն է Հին Խնձորեսկի պատմամշակութային ժառանգության պահպանումը, տարածքի բարեկարգումը, ինչպես նաև այցելուների համար անվտանգ ու հարմարավետ ենթակառուցվածքների ստեղծումը։

Արդյունքում՝

․գծանշվել ու կահավորվել է 5,4 կմ ընդհանուր երկարությամբ քայլարշավային արահետ,

․«Արահետներ հանուն փոփոխության» (Trails for Change) ՀԿ-ի հետ համագործակցությամբ կառուցվել են քարե և փայտե աստիճաններ՝ Հին և Նոր Խնձորեսկը կապող դժվարանցանելի հատվածներում,

․տեղադրվել են հայերեն, անգլերեն և ռուսերեն լեզուներով ուղղորդող ու տեղեկատվական ցուցանակներ,

․իրականացվել է հուշարձանների և հարակից հատվածների մաքրում, տեղադրվել են նստարաններ և աղբամաններ։

«Գորիսի տարածաշրջանը, Խնձորեսկն ու Տաթևը մարզի առանցքային և ամենաակտիվ զբոսաշրջային ուղղություններից են, որտեղ յուրաքանչյուր նոր ենթակառուցվածք ստեղծում է հավելյալ արժեք: Դրանք ծառայում են ինչպես մեր մարզի բնակիչներին, այնպես էլ Հայաստանից և արտերկրից ժամանող բոլոր զբոսաշրջիկներին»,- ասել է Նվարդ Հարությունյանը։

«Հայաստանի զբոսաշրջային քարտեզը համալրվեց ևս մեկ բարեկարգ և անվտանգ քայլարշավային արահետով։ Վստահ ենք, որ այն կնպաստի ինչպես զբոսաշրջիկների թվի աճին, այնպես էլ մարզի տնտեսական ակտիվության խթանմանը»,- ավելացրել է Թուֆենկյան բարեգործական հիմնադրամի տնօրեն Հուսիկ Սարգսյանը։

Նախաձեռնությունը մեկնարկել էր 2025 թվականին «Փրկենք հայկական հուշարձանները» (Save Armenian Monuments) կազմակերպության կողմից՝ Հ. Թուֆենկյան բարեգործական և Հովնանյան ընտանեկան հիմնադրամների հովանավորությամբ։

Աշխատանքների ավարտից հետո բարեկարգված տարածքները պաշտոնապես հանձնվել են ՀՀ ԿԳՄՍ նախարարության «Պահպանության ծառայություն» ՊՈԱԿ-ի տնօրինությանը։